Светлов Михаил Аркадьевич

Светлов Михаил Аркадьевич (17.06.1903, Екатеринослав, қазіргі Днепропетровск, -28.09.1964, Москва) - орыс совет ақыны. Кедей еврей отбасысында дүниеге келген. 1919 жылы бастауыш училищені бітіріп, комсомол қатарына өтті. Екатиринославтағы 1-ерікті атқыштар полкінде қызмет етті (1930). Москва мемлекеттік университетінде оқыды (1927-1928). Светловтың тұңғыш өлеңі 1917 жылы жарық көрді. Алғашқы өлеңдер жинағы – «Рельстер» 1923 жылы шықты. Содан бергі жылдар ішінде Светловтың ондаған өлең кітаптары басылды. «Гренадасы» (1926), «Каховка туралы жыры» (1935), «Жиырма сегіз» поэмасы (1942),Лиза Чайкина туралы өлеңдер циклі (1942), «Итальяндық азамат» (1943) т.б. поэзиялық туындылары Светловтың есімін кеңінен мәшһүр етті. «Бранденбург қақпасы» пьесасын жазды (1946), «Көкжиек» (1959), «Аңшының үйі» (1964) т.б. өлеңдер жинақтарын шығарды. Светловқа «Соңғы жырлар» жинағы үшін Лениндік сыйлық берілді (1967). Бұл кітап 1969 жылы қазақ тілінде аударылып басылды.