Секен Сұлтанбекұлы Дайырбеков

Секен(Сейітхан) Сұлтанбекұлы Дайырбеков (1915, Шығыс Қазақстан облысы, Ақсуат ауданы, Кіндікті ауылы – 1945, Алматы) – қоғам қайраткері, ақын, аудармашы. Қазақ педагогикалық институтын бітірген (1941). Еңбек жолын 1935 жылы Ақсуат ауданы, “Көкжартас” ұжымшарында бастауыш мектептің мұғалімі болып бастаған. 1941 жылдан қайтыс болғанша “Пионер” (қазіргі “Ақжелкен”) журналында жауапты хатшы, кейін бас редактор болды. Сонымен қатар 1943 – 44 жылдары Қазақ КСР ХКК-нің оқу ағарту және мәдениет секторын басқарған. Алғашқы туындылары 1933 жылдан облыстық және республикалық газеттерде жариялана бастады. Туған жерге деген сағыныш пен мөлдір сезімге толы “Арман” атты өлеңдер жинағы 1950 ж. жарық көрді. (Сейітхан) орыстың көрнекті ақындары М.Ю. Лермонтов пен В.В. Маяковскийдің өлеңдерін қазақ тіліне алғаш аударған қазақ ақындарының бірі болып саналады. Дайырбеков өзінің қысқа ғұмырында “Менің жарым”, “Асыққанның ісі шала”, “Калина”, “Чекист Марат” атты өлеңдер мен поэмалары топтамасында сезім байлығын, 20 ғасырдың 1-жартысындағы қазақ өмірінің тыныс-тіршілігі мен туған елінің ақ тілеуі мен ниетін жүрек жара жырлады.