Сталактиттер

Сталактиттер (грек. stalaktos – тамшылап ағушы) – минералданған сулардың тамшылауынан үңгірлердің, кеніштердің төбесінде және жоғарғы қабырғаларында түзілетін минералдық тассүңгі тізілімдер. Сталактиттер әдетте әк құрамды болып, төмен қарай сүңгі, түтік, айдар, шашақ түрінде карст үңгірлерінде салбырап тұрады. Олар үңгір төбесіндегі жарықшақтар мен тесіктерден ағып келетін су тамшыларының буланып, құрамындағы кальций көмірқышқылының тұнба шөгіндіге айналуынан пайда болады. Сталактиттер кейде гипс пен тұз құрамды ерітінділер булануынан да түзіледі. Сталактиттердің өлшемдері мен түстері әр түрлі.