Сұқсыртәрізділер

Қазақстанның шөл даласынан басқа аймақтарда таралған. Қоректерін судан тауып жейді. Бұлардың 20 шақты түрі бұрынғы КСРО мен Қазақстанның территориясында мекендейді. Сұқсыртәрізділердің 5 өкілі ХТҚО Қызыл кітабына тіркелді.

Сұқсыр-осы отрядқа жататын құстардың ең ірісі. Наурыз-сәуір айларында жылы жақтан ұшып келіп, ұрпағын көбейту үшін дайындалады. Жұптасып тіршілік етеді. Сұқсырлар су бетінде қалқып жүретін ұя жасайды, аналығы салған 3-7 жұмыртқаны аталығы мен аналығы кезектесіп басып, балапандарға бірдей қамқорлық жасайды. Бұлардың балапандары- ширақ, денесі аздап кебе салысымен ұяны тастап, өзінше тіршілік етуге кіріседі. Балапандары алғаш жүзген кезде аналық сұқсырдың қауырсындарының арасына кіріп, сұқсыр сүңгігенде суға бірге батады және су астында оны ажырап кетпей, қауырсындардың арасынан тұмсығын ғана көрсетіп, енесінің денесіне жабысып алады, судан көтерілгенде енесінің арқасында отырады.

Сұқсырдың салмағы 650-1400 граммдай, балықпен қоректенеді. Ол суда жақсы жүзіп, сүңги алады. Сұқсырдың аяғында 4 саусағы бар, олардың үшеуі алға қарай бағытталады және алға бағытталған саусақтардың әрқайсысы қалақша тәрізденіп жиектеледі. Сұқсыр-жыл құсы,қазан айында жылы жаққа қайтады.