Тамыр аймақтары

Тамыр көптеген және әр түрлі жасушалардан тұрады.Оны бірнеше бөліктерге немесе аймақтарға бөлуге болады.Тамырдың ең ұшын тамыр оймақшасы жауып тұрады.Тірі, жұқа өабықшалы жасушалардан тұратын тамыр оймақшасы әрдайым қабыршақтанып, түлеп отырады.

Тамыр оймақшасының жабын ұлпалары болады. Олар тамырды топырақта болатын кейбір қатты бөлшектердің зақымдануынан қорғайды. Оймақшаның сыртқы жасушаларының түлеп түсуі тек топыраққа үйкелуден ғана болмайды. Олардың астыңғы жағында жас, тірі жасуша қабаттары болады. Мұнан тамыр үйкелісін азайтатын , тамырдың топырақта қозғалуын жеңілдететін зат бөлінеді. Құрғаған жасушалар қабыршақтанып түседі.

Тамыр оймақшасының астында түзуші ұлпа орналасады. Оның жасушалары әрдайым бөлініп, өсіп отырады. Барлық бөлінетін жасушалар осы ұзындығы 1 мм бөліну аймағында болады. Тамыр, бөліну аймағындағы жасушалардың бөлінуі нәтижесінде ұзарып өседі.Бұл аймақтың түсі сарғыш келеді.

Бөліну аймағынан соң тамыр жұмсақ, мөлдір болып көрінеді.Бұл-өсу аймағы. Өсу аймағындағы жасушалар созылыңқы болып келеді және бұл аймақтың мөлшері онша үлкен болмайды. Мұнан жоғары ұзындығы 5-200 мм болатын сору аймағы орналасады.Минералды заттар мен суды сору қызметін осы аймақта болатын тамыр түкшелері атқарады.Тамыр түкшелері қабырғасы, цитоплазмасы, ядросы және басқа бөліктері бар жасуша екенін ұлғайтқыш әйнекпен байқауға болады.

Тамырдың 1мм2 бетінде 200-ден 400-ге дейін тамыр түкшелері болады. Тамыр түкшелері болғандықтан, тамырдың сору беті 18 есеге жуық өседі. Тамыр түкшелері 10-20 тәулік қана тіршілік етеді. Тамырдың жас бөлігінде жаңа тамыр түкшелері түзіледі.