Толағай жерасты су алабы

Толағай жерасты су алабы Қызылорда облысы Арал қаласынан 78 – 98 км жерде орналасқан. Барлау жұмыстары Арал қаласын және оған жақын жатқан елді мекендерді ауызсумен қамтамасыз етіп, егінді жерлерді суару мақсатында жүргізілген. Қалыңд. 60 м-ге дейін жететін арынды тұщы сулы қабат эоцен кезеңінің ұсақ, орташа түйірлі құмды шөгінділері қойнауында қалыптасқан. Артезиандық су көзін ұңғымалар арқылы ашқан кезде су жер бетіне 3 м-ге дейін жақындаған. Арынды су деңгейін 17 – 35 м-ге төмендеткенде әр ұңғымадан тәулігіне 1900 – 3450 м3 су алынды. Т. ж. с. а-ндағы су қорының тәуліктік пайдалану мөлшері 95 мың м3 есебінде жоспарланған. Қазіргі таңда пайдалану мөлш. 4,5 – 5 мың м3; бұл барланған қордың 5%-ын құрайды.