Торғай геологиялық барлау экспедициясы

Торғай геологиялық барлау экспедициясы – Арқалық қаласында ашылып, өлке аумағындағы жерасты кен көздерін зерттеумен айналысқан ғылыми орталық. 1958 жылға дейін Орталық Қазақстан геологиялық басқармасының құрамында болып, кейін Солтүстік Қазақстан геологиялық басқармасының қарамағына кіргізілген. 1964 жылы осы кезеңде алдында қойған міндеттерді орындап біткен мекеме ретінде жабылды да, 1968 жылы Арқалық геологиялық партиясы, 171 жылдан ТГБЭ болып қайта жұмыс істей бастады. Экспедиция Амангелді бокситті ауданы тобын, Қаратомар жерасты тұщы су көздерін барлады. Алтын, түсті және сирек металдар, құрылыс материалдары кен орындарын іздестірді. Боксит кен орнының негізінде Торғай боксит кен басқармасы жұмыс істейді. Экспедицияны әр жылдары П.С.Гурин, А.Тоқсынбаев, В.Ф.Халецкий, Е.А.Ерекешов, В.Г.Тищенко, С.М.Есқожин басқарып, М.А.Қалменов, С.Б.патрикевич, Е.Қ.Қонысбаев, Ю.П.Рылов, А.Е.Ниязов бас геолог болып істеді. Экспедиция құрамында 1 Қазақ КСР еңбек сіңірген геологі қызмет атқарып, 13 ғалым орден-медальдармен марапатталған.