Трансференттік баға

ТРАНСФЕРЕНТТІК БАҒА – кәсіпорынның көтерме сауда бағасының бір түрі. Бір фирманың немесе кәсіпорынның бөлімшелері арасында коммерциялық операциялар жасау кезінде қолданылады. Трансференттік баға халықаралық бірлестіктер, фирмалар, компаниялар, ұлтаралық корпорациялар, холдингілер (соның ішінде олардың түрлі елдерде орналасқан бөлімшелері) арасында тауарлар көрсетілетін қызметтер жеткізілімі үшін есеп айырысу кезінде барған сайын кеңінен таралып келеді. Трансференттік бағаны бас компания бөлімшелерге, еншілес компанияларға жеткізілетін не олардан алынатын тораптарға, бөлшектерге, жинақталатын бұйымдарға, күрделі дайын техникалық бұйымдарға тағайындайды. Бұл баға әдетте жария етілмейді. Сонымен қатар Трансференттік баға басқарушылық төлемдер мен қаржы операциялары үшін де, мысалы фирма ішіндегі қарыз бойынша пайызды айқындау кезінде пайдаланылады, сондай-ақ пайдамен айла-шарғы жасау және оны салық заңнамасы неғұрлым жұмсақ елге аудару үшін де жиі қолданады.