Трикотаж машинасы

ТРИКОТАЖ МАШИНАСЫ, іліп тоқу машинасы – трикотаж маталар мен бұйымдарды тоқуға арналған машина. Трикотаж машинасында жіптерден жасалған тұзақтарды өзара байланыстыру арқылы әр түрлі жіп өрілімдері тоқылып шығарылады. Трикотаж машинасы атқаратын қызметіне, құрылымына, инесінің түріне, т.б. қарай ажыратылады. Трикотаж машинасының барлық түрі ине қорабының бір өлшем ұзындығына келетін инелердің санына сәйкес класқа бөлінеді. Кең тараған ағылшын жүйесінде ине қорабы ұзындығының өлшем бірлігіне дюйм алынған. Трикотаж машинасының класы жоғарылаған сайын тоқылатын мата жұқара береді. Трикотаж машинасының негізгі жұмыстық бөлігі тұзақ жасаушы (тоқушы), жіп беруші және тоқылған матаны әкетуші механизмдерден тұрады. Трикотаж машинасын одан әрі кемелдендіру жұмысы оның класын жоғарылату, тұзақ жасаушы жүйелердің санын арттыру және тоқу процесін автоматтандыру бағытында жүргізіледі. Трикотаж машинасының жазықтық және дөңгелек көлденең тоқу түрлері болады. Дөңгелек көлденең тоқу Трикотаж машинасы жасанды үлбір тоқу үшін қолданылады. Жазықтық тоқу Трикотаж машинасы жоғары сапалы бұйымдарды (сырт киімдерді) өндіруге арналған. Қазіргі кезде әлемдік саудада негізгі позициядағы жазықтық Трикотаж машинасын Stoll (Германия), Shіma Seіkі (Жапония), Prottі (Италия) фирмалары шығарады. Stoll фирмасы шығарған жазықтық тоқу машиналары қазіргі заманның барлық талаптарын (тиімділік, сенімділік, автоматтандырудың Жоғарғы дәрежесі, шексіз өрнектеу мүмкіндіктері, кең ауқымды, т.б.) қамтамасыз етеді және компьютермен басқарылады.