Тура бағыттан атыс

Тура бағыттан атыс (орыс. стрельба прямой наводкой) — зеңбірек тікелей нысанаға бағытталған жағдайда, ашық атыс позициясынан артиллериялық зеңбіректен атыс жүргізу. Тура бағыттан атыс үшін бөлінген артиллериялық зеңбірекке төмендегі міндеттер жүктелуі мүмкін: қарсыластың шабуылдаушы танкілері мен жаяу әскерлерін жою (тойтару); ұзақ мерзімді және далалық қорғаныс құрылыстарын қирату; әр түрлі құрылыстарда тасаланған атыс құралдары мен адам күшін жою; танкілерге және жаяу әскерге қарсы бөгеттерді қирату; су бетіндегі нысаналарды және т.б. жою. Тура бағыттан атыс әр түрлі калибрдегі зеңбіректерден жүргізіледі, ату қашықтығы әдетте 500-1500 м, ал кейбір жағдайларда одан да жоғары. Тура бағыттан атыспен жоғары тиімділікке және атыс міндеттерін қысқа мерзімде әрындауға қол жеткізіледі. Мыс., 2 км қашықтықтағы жабық атыс позициясында 122-мм келте зеңбірекпен атыс кезінде блиндажды қиратуға 40 снаряд қажет, ал әрбір жарылысты бақылауға мүмкіндік болмаған жағдайда 150-ден астам снаряд қажет. Тура бағыттан атыспен осы міндетті орындау үшін 1-3 рет дәл тигізу жеткілікті.