Түпмұнайлы свита

Түпмұнайлы свита - құрамында биогендік шашыранды органикалық заттары және мұнай мен газдың өндірістік жатындарын түзуге қабілетті көмірсутектері бар, литологиялық тұрғыдан біртекті болып келетін свита. Түрлі дәрежедегі түпмұнайлы свита рөлін, сайып келгенде, әр түрлі литологиялық құрамдағы, шашыранды органикалық заттарды және осы заттар есебінен қалыптасқан мұнай-газ көмірсутектерін кіріктірген кез-келген субаквалық түзілімдер жиынтығы атқара алады. Алайда олардың барлығы бірдей көмірсутектердің өндірістік жатындарын қалыптастыру көзі рөлін атқаруы шарт емес. Түпмұнайлы свиталарды анықтаудың біршама қолайлы белгілері төмендегідей: шөгінділердің байырғы теңіздер түбінде, сирегірек тұщысулы алаптар жағдайында түзілуі; шөгінділер құрамында тотықсызданған геохимиялық фациялардың кеңінен таралуы; таужыныстар құрамында шашыранды органикалық заттардың және сол заттар құрамында сапропелді микроқұрамбөліктердің үйірімділігі жоғары дәрежеде болуы; таужыныстарда шашыранды мұнай көмірсутектері үйірімділігінің мол болуы. Жалпылама есептеулер нәтижесіне қарағанда, құрамындағы шашыранды органикалық заттар мөлшері 1 млн т/км²-ден астам болатын свиталар ғана мұнайдың өндірістік қорларын кіріктіре алады. Түпмұнайлы свитаны анықтауда, шашыранды органикалық заттардың жалпы мөлшері мен типі жайлы деректермен қатар, таужыныстардың литологиялық құрамы және түпмұнайлы свита қимасының құрылыс ерекшеліктері де маңызды рөл атқарады.