Уақыттық айырмашылық

Уақыттық айырмашылық– есепті кезеңдегі бухгалтерлік және салық салынатын табыстың арасындағы айырма, ол кіріс пен шығыстың бірсыпыра баптары салық салынатын табысқа енгізілген кезеңнің бухгалтерлік табысқа енгізілетін кезеңмен сәйкес келмеуі себепті пайда болады. Мысалы‚ бағалы қағаздарды өткізуден келтірілген залалды өтеудің әр түрлі тәсілдерін қолдануда пайда болатын айырмашылық; күмәнді борыштардың сомасын есептен шығарудан пайда болатын айырмашылық. Уақыттық айырмашылық есепте сомадан түсетін салық тиімділігін анықтау және көрсету арқылы есепке алынады, бұл тиімділік мерзімді ұзартуға немесе аванс ретінде төлеуге жататын төлем болып табылады. Уақыттық айырмашылықты есептеген кезде абсолют шамалар ғана емес‚ сонымен бірге айырмашылық белгісі де (– немесе +) маңызға ие болады. Уақыттық айырмашылықтан алынатын салық тиімділігі және дебет сальдосы ретінде де‚ кредит сальдосы ретінде де болуы мүмкін. Дебет сальдосы есептелген салық төлемінің бухгалтерлік есепте табыс салығы бойынша шығыс ретінде танылмайтынын айғақтайды және мерзімінен бұрын төленуге тиіс салық төлемі ретінде қарастырылады. Кредит сальдосы есептелген салық төлемінің мерзімі ұзартылуға тиіс табыс салығы бойынша шығыс ретінде танылатынын айғақтайды, өйткені салық заңдары бойынша ол уақыттық айырмашылықты жойғаннан кейін танылатын болады.