Фолликулит

Уикипедия — ашық энциклопедиясынан алынған мәлімет
Мұнда ауысу: шарлау, іздеу

Фолликулит (follіculіtіs; лат. follіculus — қалта және іtіs — қабыну) — шаш фолликулаларының іріңді қабынуы. Фолликулитті стафилококк микробтары қоздырады. Ауру терінің шаң не маймен ластануынан, жеңіл жарақат салдарынан, терінің қажалуынан, тітіркенуінен, сондай-ақ организмде зат алмасу процесінің бұзылуынан, витаминдер (А, С) жетіспеушілігінен, қышыма тері ауларының (қотыр, экзема, нейродермит, т.б.) салдарынан дамиды. Егер сақал-мұрттың түбі қабынып және қабыну созылмалы түріне айналса, оны — сикоз деп атайды. Бетке, мойынға, иыққа, балтырға, санға шыққан Ф-тің диам. 0,5 см, ұшы іріңдеген түйін түрінде болады. Олар шаштың түбін тесіп өтіп, бірнеше күннен кейін қатпарланып, қабықтана бастайды. Ал ішке қарай тереңге орналасқан Фолликулиттің мөлше едәуір үлкен (диам. 1 см-дей), пішіні конус тәрізді, іріңді безеу түрінде болады. Оны қолмен басқанда ірің шығып, адам ауырсынады. Денеде Фолликулит пайда болғанда, қолмен қысып, зақымданған теріні жууға болмайды, себебі инфекция тарауы мүмкін. Фолликулит пайда болған терінің айналасын спиртпен сүрту қажет. Егер ауру созылмалы түріне ауысса, диета сақтаған жөн. Аурудың алдын алу үшін тері күтімі дұрыс болуы керек. [1][2]

Пайдаланған әдебиет[өңдеу]

  1. О.Д.Дайырбеков, Б.Е.Алтынбеков, Б.К.Торғауытов, У.И.Кенесариев, Т.С.Хайдарова Аурудың алдын алу және сақтандыру бойынша орысша-қазақша терминологиялық сөздік. Шымкент. “Ғасыр-Ш”, 2005 жыл. ISBN 9965-752-06-0
  2. "Қазақ Энциклопедиясы" 9 том