Хромшпинелиттер

Хромшпинелиттер (хром және грек. spіntes — ұшқын), хромшпинельдер, хромиттер — тотықтар класына жататын минералдар тобы. Химиялық формуласы: (Mg,Fe2+)Cr2O4; магнезиохромит MgCr2O4 пен феррихромиттің FeCr2O4 изоморфтық қоспасы, құрамы (%): MgO — 9,69, FeO — 17,26, Cr2O3 — 73,05 қоспалары — Fe3+, AҚ, Zn. Кубтық сингонияда кристалданады, жеке кристалдары октаэдр пішіндес, минералдық агрегаттары бұрыс пішінді түйірлі масса, сеппелер түрінде болады, түсі қара, қара қоңыр, металдай жылтыр, қатты. Моос шкаласы бойынша 5,5 —7,5, тығыздығы 4,0 — 5,1 грамм/куб сантиметр, магниттік, жартылай өткізгіштік қасиеттері бар. Ультранегізді тау жыныстарында, серпентиниттерде, талькті және хлоритті тақтатастарда сеппе, шомбал масса түрінде серпентин, оливин, хлорит, гранит, везувиан, пироксен, тальк, платиноидтар, т.б. минералдармен бірге кездеседі. Басты минералдарына: магнохромит (Mg,Fe)Cr2O4 хромпикотит (Mg,Fe)(Cr,AҚ)2O4 алюмохромит Fe(Cr,AҚ)2O4 магнеферрихромит (MgFe)(Cr,Fe)2O4 феррихромшпинель Mg(Cr,AҚ,Fe)4O4 феррихромпикотит (Mg,Fe)(Cr,AҚ,Fe)2O4, т.б. жатады. Хромшпинелиттер Орал, Жаңа Каледония, Оңтүстік. Африка кендерінде шоғырланған. Қазақстандағы хромшпинелиттердің аса мол қоры Кемпірсай ультранегізді массивінде бар.