Шпрот

Шпрот (Sprattus) – майшабақ тұқымдасына жататын балық. Бұлардың қоңыржай және субтропиктік аймақтарда, Еуропа, Оңтүстік Америка, Австралияның оңтүстігінде және Жаңа Зеландия суларында тіршілік ететін 4 түрі бар. Шпроттардың дене тұрқы 17 – 18 см, салмағы 10 – 12 г, денесін түсіп қалатын қабыршақтар жапқан. Бүйірі қабысыңқы, бауыр қанаты ара тісті, аузы кішкене. Жыныстық жағынан 1 – 2 жаста жетіледі, 2,5 мыңдай уылдырық шашады, уылдырықтары пелагиалды (терең су қабатында дамиды). Үйірімен тіршілік етеді, 5 – 6 жыл өмір сүреді. Ұсақ зоопланктонмен қоректенеді. Оларды жыртқыш балықтар мен дельфиндер қорек етеді. Шпроттың кәсіптік маңызы зор, тағамға сүрленген, тұздалған күйінде пайдаланылады, консерві дайындалады.

Дереккөздер

• «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, VIII том