Шығу (Чигу)

Уикипедия — ашық энциклопедиясынан алынған мәлімет
Jump to navigation Jump to search

Шығу, Чигу, Чигучен – көне қала. Үйсін билеушілерінің ордасы болған. Ол туралы б.з.б. 2 ғасырдағы Қытай деректерінде айтылады. Онда үйсін билеушілеріне ұзатылған қытай ханшайымына арналып қытай стилінде сарай салынған. Қаланың орны осы күнге дейін анықталған жоқ. Кейбір зерттеушілер Шығу Ыстықкөлдің оңтүстік жағалауында деген пікір білдірген. Жаңадан табылған деректерге сүйене отырып көптеген ғалымдар оны Кеген немесе Шарын алқабында орналасуы мүмкін деп есептейді. Кеген жазығында үйсін дәуірінің патшалар қорымы тобына жататын алып обалар көп. Бұл үйсін билеушілері осы маңайда тұрған деген қорытынды жасауға негіз болды. Оған қоса Қарқараның маңында Құмтекей аталатын ат төбеліндей ашық аймақ бар. Айналасы көк шалғын, биік тау жазығындағы осы жерден көне заттардың түрлі қалдықтарын жергілікті тұрғындар табады. Қытай деректерінде айтылатын үйсіндер еліндегі суық ауа райы осы жердің климатымен сәйкес келеді. Тағы бір пікір бойынша Шығу Шарын өзенінің оң жағалауынан табылған көне елді мекеннің орнымен сәйкес келеді. Бұл елді мекен б.з.б. 3 – б.з. 4 ғасырларында өмір сүрген.

Сілтемелер[өңдеу]

"Қазақ Энциклопедиясы", 9 том