Экологиялық тәуекелді сақтандыру

Экологиялық тәуекелді сақтандыру – өндірісте болған апаттан қоршаған табиғи ортаның ластануы және кейіннен ықтимал азуы үшін жауапкершілігін сақтандыру түрі.
Мұндай жағдайды тудырған апаттың салдары еңбек етуге қабілетті азаматтардың өмірден өтуіне, денсаулығынан айрылуына, еңбек ету қабілетін жоғалтуына, мүлкінен айрылуына, пайданы кем алуына, басқа да залал шегуіне себеп болады. Апаттық ластануға әдетте апаттық оқиғалардың салдарынан атмосфераға (гидросфераға) зиянды заттектердің шығарылуы (сарқындының ағызылуы), бұл заттектердің топыраққа жайылып сіңуі (суға жайылып араласуы), шуыл, діріл, радиация, темп-раның өзгеруі, басқа да жайсыз әсерлер жатады. Экологиялық тәуекелді сақтандырудың мақсаты – сақтанушылар мен сақтандырушылардың өзара қоршаған ортаны апаттық сипатта ластау қатерін азайтуға экономикалық мүдделілігін қалыптастыру және табиғат қорғау шараларын қаржыландырудың қосымша көздерін іздестіру. Ол ерікті негізде де, міндетті негізде де сақтандырылады. Міндетті сақтандырудың мақсаты – сақтандыру жарналарын өндірістік шығынға жатқызу мүмкіндігін жасау және сол арқылы кәсіпорындарды осы сомадан салық төлеуден босатады. Қазақстанда Экологиялық тәуекелді сақтандыру “Қоршаған ортаны қорғау туралы” Қазақстан Республикасы заңында (1997) көзделген.

Дереккөздер

Қазақ ұлттық энциклопедиясы, 10 том