Экспорттық Несие

Экспорттық Несие – тауарлар мен көрсетілетін қызметтерді сатуды қаржыландыру мақсатымен шетелдік сатып алушыларға немесе олардың банкілеріне берілетін несие; экспортты ынталандыру құралы. Импортшылар мен экспортшылар несиені тікелей өздерінің шетелдік контрагенттерінен немесе оларға қызмет көрсетуші банкілерден алады. Ол әрқашанда сыртқы сауда келісімшартын жасау жолымен беріледі. Оның мөлшері, мерзімі, құны, пайыз төлеу және өтеу шарттары экспортшы және импортшы елдердің экон. және саяси жағдайына, тауардың түріне және тараптардың өзара қатынастарының сипатына қарай айқындалады. Э. н-нің дәстүрлі және кең таралған нысандары: шетке шығарылатын тауарларды өндірушілердің өздерінің шетелдегі сатып алушыларына жеткізілетін тауарлар үшін төлем төлеу мерзімін ұзарту нысанында беретін коммерциялық несие; шетке шығарылатын тауарлар мен көрсетілетін қызметтерді жеткізушілерге де, сатып алушыларға да берілетін банк несиесі; түрлі мемлекетаралық келісімдер шеңберіндегі несиелер; экспортшылар мен импортшыларға брокерлік фирмалар арқылы берілетін брокерлік несие; экспортты несиелендірудің кеңінен таралған нысаны – акцептілік несие болып бөлінеді. Банкілер ірі экспортшыларға револьверлік (жаңартылмалы) несие береді. Э. н-нің дамуы барысында сыртқы сауда операцияларын факторинг, форфейтинг, лизинг негізінде қаржыландыру пайда болды. Ірі көлемдегі сыртқы сауда келісімшарттарын несиелендіру үшін банк консорциумдары құрылады. Олар ірі көлемдегі несие ресурстарын жинап, несие тәуекелін қатысушы банкілердің арасында бөлуге мүмкіндік береді (қ. Синдикатталған несие). Э. н. беру әрқашан да тәуекелмен байланысты болғандықтан, дамыған елдердің көбісінде олардың сақтандырылуын қолдау жүйесі қалыптасқан.