Эпиция

Эпиция
Ғылыми топтастыруы
Дүниесі: Өсімдіктер Бөлімі: Magnoliophyta Табы: Magnoliopsida Тегі: Эпиция

ЭПИЦИЯ (EPISCIA) ЭПИЦИЯ – геснерия тұқымдасына жататын көпжылдық шөптесін өсімдік. Шырмауық секілді және жерге жайыла өсетін түрлері көп. Табиғатта 40-қа жуық түрі бар. Тропикалық Оңтүстік және Орталық Америка аймақтарында таралған. Эпициялардың сабақ, жапырақтарының мамық түгі болады. Жапырақтарының әдемілігімен бірге оның майда ашық түсті гүлдері де өте сүйкімді. Эпицияның бөлме жағдайында өсетін түрлерінің жапырақтары мен гүлінің түстері әр алуан. Эпиция (Episcia cupreata) – әдемі жапырақты, төменге қарай жайыла өсетін өсімдік. Жапырақтарының ұзындығы 10 см, эллипс пішінді, жиектері аратісті. Сабағы мен жапырақтары түкті. Жасыл түсті бедерлі, әжімді жапырақтарының беті мыс жалатып қойғандай жылтыр болып келеді. Жиегіндегі қоңырқай, қошқыл қара түстер жапырақтарын айқындап, әдемі өң береді. Сонымен қатар жаз айларында түтік тәріздес (ұзындығы 2-3 см) ашық қызыл түсті гүл жарады. Төменге қарай жайылып өсетіндіктен аспалы түбектерде өсірген абзал.

Жарығы:

Тіке түскен күн көзінен қорғау керек. Жарықта және алакөлеңкеде өседі.

Жылуы:

Жазда жылы, қыста 180С төмен болмағаны абзал. Жел өтінен сақтаған жөн.

Суғарылуы:

Жазда молынан жиі, қыста топырағының беткі қабаты құрғағанда суғарылады. Суғарғанда жапырақтарына су тигізбеу керек.

Ылғалдылығы:

Ылғалдылықты қажет етеді, бірақ жапырақтарына су бүркуге болмайды. Түбектің астындағы ыдысқа қиыршық тастар салып, түбек түбіне тимейтіндей мөлшерде су құйып қою керек. Немесе гүлдің жанына ыдысқа су құйып қоюға да болады.

Қоректендірілуі:

Сәуірден тамызға дейін екі аптада бір, қыста қоректендірмейді.

Аурулары:

Ақ ұнтақ құрты мен өсімдік биті, аққанат және трипс зиянкестерінің әсерінен ауруы мүмкін.

Көбейтілуі:

Тұқым, қалемше және жанама өскіндері арқылы көбейтіледі.

Сілтемелер

• Гүлстан, өсімдіктер туралы сайт Мұрағатталған 20 ақпанның 2012 жылы.

Дереккөздер

"Гүлстан" республикалық ғылыми-танмыдық, көпшілік журнал, 2010 жыл ISSN 2078-6727