Ғадас Салықов
Ғадас Салықов (1897, Шығыс Қазақстан облысы, Ұлан ауданы, қазіргі Бестерек ауылы, Шөже елді мекені -1937) - Халықты сауаттандыру жүйесіне белсене араласқан, Кеңестік жүйеде оқытуды қолға алған ең алғашқы мұғалім.
Өскемен қаласында 7 жылдық қазақ мектебінің ашылуына зор көмек көрсеткен. Адал еңбегімен, әділетті ісімен халық құрметіне бөленген, халыққа Республикалық көлемде танымал болған, өз елінің айтулы азаматы, Ұлан ауданының біртуар перзенті, қайталанбас тұлға.
1918 жылы Семей қаласында ашылған мұғалімдер курсына Ұлан ауданын алғашқы жіберілген 8 адамның бірі осы Ғадас болған. Ол Кеңестік жүйеде оқытуды қолға алған Ұлан ауданындағы алғаш мұғалім. Өзінің алғырлығы мен оқуға ынтасымен көзге түскен Ғадас біраз уақыттан соң мектеп директоры лауазымына тағайындалады. Ағарту ісіне белсене араласқан Ғадас Салықов іскерлігі мен ұйымдастыру қабілетінің арқасында өлкелік басқарманың нұсқауымен ел билеу жұмысына ауыстырылады. Ол Тарғын болысына депутаттар Советінің болыстық атқару комитетінің председательдігіне сайланады. Осы қызметте жүріп оқу-ағарту ісіне белсене араласып, зор көмек көрсетіп отырады. Ол Өскемен қаласында 7 жылдық қазақ мектебінің ашылуына үлкен көмек жасай отырып, діншілдердің қарсылығына қарамай қазақтың 15 баласын оқуға жібертеді.
Ғадас Салықовтың халық игілігі үшін адал еңбек етіп, жұртшылықты сүйсіндіретін істері жайында, әсіресе оның жас жеткіншіктерді оқытуға көп көңіл бөлетінін дәлелдейтін мақалалар сол кездегі газет беттеріне жиі жарияланып жүреді. Ол туралы «Ғадас ағай кішіпейіл, коллектив алдында беделді болды. Арыз айта келген адамдарға аса көңіл қойып байыппен тыңдайтын. Оқу-ағарту ісіне аса көп көңіл бөліп, жеткіншектердің сауатты болуына зор көмек көрсетті», - деген тек жылы лебіздер болды. Ғадас Салықов қандай қызмет атқарса да жауапкершілікпен атқарып, еселі еңбегімен көзге түсіп, үлгі бола білді.
Еңбектері елеусіз қалған жоқ. Көптеген марапаттауларға да ие болды. Еліне адал қызмет етіп, мемлекетті нығайтуға жан–тәнімен еңбек еткен өз елінің айтулы азаматы, халыққа Республика көлемінде танымал болған Ғадас Салықов 1937 жылы 40 жасында қайтыс болды.