Ғарифа Мәжитқызы Рахметова

Ғарифа Мәжитқызы Рахметова (1922 ж.т., қаз. Атырау облысы, Азғыр ауылы - 18.8.2001, Орал) - еңбек және соғыс ардагері. 1953 ж. Орал педагогика институтының физика-математика факультетін бітірген. Еңбек жолын мектеп мұғалімі ретінде бастаған ол 1942 ж. әскер қатарына алынып, Мәскеудегі әскери байланыс мектебінде оқыған. Калинин, Солтүстік-батыс, Брянск, Прибалтика, 1-ші Белорусь майдандарына қатысып, радиотелеграфшы болған. 1945 жылдың соңында әскери қызметтен оралып, Орал қалалық комсомол комитетінің хатшылығына сайланған. 1946-49 ж. Қаратөбе орта мектебінде, Орал ауыл шаруашылық мектебінде мұғалім, 1949-63 ж. облыстық партия комитетінде нұсқаушысы, Чапаев ауданы партия комитетінде 2-хатшы, кейін облыстық партия комитетінде бөлім меңгерушісі, облыстық кино тарату басқармасын басқарды. 2 дәрежелі Отан соғысы орденінің және бірнеше медальдің иегері, Ұлы Отан соғысының 50 жылдығына орай «Отан» орденімен марапатталған.