Қадырбек Әбдіқадырұлы Қаметов

Қадырбек Әбдіқадырұлы Қаметов (1952 ж. т.) - суретші. Графика және кескіңдеме саласында жұмыс істейді. Ол «Абай шығармаларының желісі бойынша» атты З беттік топтамасындағы (1986, қағаз, литография. Қазақстан Республикасының мемлекеттік өнер музейі)«Барымта», «Алтыбақан», «Көш» суреттерінде халықтың шынайы тұрмысын көрсеткен. Олар композициялық қуатымен, көлемнің түр-түстік өлшемі, кейіпкерлердің нанымды қарым-қатынасы, кеңістікті дұрыс пайдалана білу тәсілдерімен ерекшелеңеді. Оның Абайдың өлеңдер жинағына (1986-87, «Жалын» баспасы) жасаған иллюстрациясына «Кеш» (мұқаба қабы), «Абайдың портреті» (фронтисписі), 2 жапсарлас беттегі «Алтыбақан», «Барымта» иллюстрациясы, 4 беттік, 10 жартылай беттік суреттері енген. Топтамаға «Шомылып жатқан қыздар» деген шартты атаулы иллюстрация енбей қалған. Абай портреті топтамада жетекші орын алады. Онда ақын пішіні тұлғалы: жарқыраған кең маңдайы, қас пен мұрнының қатулы тұрпаты, кең жанары, жымқырылған ерні - турашыл, күрескер жанның тұлғасын танытады.