Қажымұрат Сыздықов

Қажымұрат Сыздықов (18.12. 1920 жылы туған, Көкшетау облысы. Чкалов ауданы Қарағаш ауылы) - жазушы, аудармашы.

2-дүниежүзілік соғысқа қатысқан. ҚазҰПУ-ды бітірген (1957). 1945-56 жылдары Қазақ радиосында редактор, "Теміржолшы" газетінде әдеби қызметкер, 1956-68 жылдары "Мектеп" баспасында, 1968-85 жылы Қазақ энциклопедиясы Бас редакциясында аға редактор қызметін атқарған. С.Сейфуллиннің "Мен қалай өлең жаза бастадым" естелік әңгімесін (1959), Е.Ысмайыловтың "Ақындар" (1958, Ю.О. Домбровскиймен бірге), С.Мұқановтың "Шоқан Уәлиханов" монографияларын (1965) орыс тіліне аударған. Л.Н. Толстойдың "Сергей әулие" (1978), В.Л. Василевскаяның "Қатерлі күресте" (1962), "Айнымас махаббат" (1967) повестерін, Г.М. Марковтың "Сібір" (1977, 2-кіт.), Э.М. Ремарктың "Батыс майданында өзгеріс жоқ", "Қайтқанда" (екеуі де 1985), Фейхтвангердің "Испан хикаясы" (1988) романдарын, А.Е. Макаренконың "Пүшайман болған әулие" (1972). В.М. Шукшиннің "Өлермендер" (1973), Н.Г. Мирошниченконың "Ақ құсты аялайық" (1974) пьесаларын, сондай-ақ, А.П. Чеховтың, И.А. Буниннің, Р.Тагордың, О.Генридің кейбір шығармаларын қазақ тіліне аударған. 1-дәрежелі Отан соғысы орденімен және медальдармен марапатталған.