Қазақстан аграрлық партиясы

Қазақстан аграрлық партиясы – қоғамдық-саяси ұйым.

Тарихы

Құрылтай съезі 1999 жылы 6 қаңтарда Астана қаласында өтті. Съезде партия жарғысы мен бағдарламасы қабылданды, төрағасы болып Ромин Мәдинов сайланды. 1999 жылғы 16 наурызда Қазақстан Республикасы Әділет министрлігінде тіркелген.

Партия ауыл тұрғындары мен аграрлық сала жұмысшыларының әлеуметтік, мәдени, азаматтық, саяси, экономикалық құқықтары мен мүдделерін қорғау, Қазақстан мемлекеттігін нығайтуға ықпал жасауды мақсат етті. Қазақстан аграрлық партиясын негізінен ауыл шаруашылығы еңбекшілері, фермерлер, жеке қожалықтар, ауылдық кооперативтер мен бірлестіктер құрады.

1999 жылы Парламент сайлауында партия 7%-дық межеден өтіп, Парламент Мәжілісінде 2 депутаттық орын алды. Қазақстан аграрлық партиясының парламентте 11 депутаттан тұратын тобы бар. Партияның баспасөз органы – “Мерей” журналы мен “Аграрлық Қазақстан” газеті болып табылады. Қазақстанның барлық облыстарында және Астана мен Алматы қалаларында өкілдіктері қызмет жасайды. Қазақстан Республикасының 2002 жылы 15 шілдеде қабылданған “Саяси партиялар туралы” Заңына сәйкес 2003 жылы 6 наурызда Әділет министрлігінде қайта тіркеуден өтті. Партияның 90 мыңнан астам мүшесі болды.

2005 жылғы 27 қыркүйекте Петропавл қаласында Қазақстан Президенті Нұрсұлтан Назарбаевтың қатысуымен партияның VI кезектен тыс съезі өтті. Съезд барысында партия 2005 жылғы президенттік сайлауда Нұрсұлтан Назарбаевтың кандидатурасын қолдайтынын жариялап, Аграрлық партияның қазіргі мемлекет басшысын қолдау жөніндегі Халықтық коалицияға қосылатынын мәлімдеді.

2006 жылғы 22 желтоқсанда Қазақстанның Аграрлық партиясы таратылып, президенттік «Нұр Отан» Халықтық демократиялық партиясына қосылды.