Қазақстан қаржыгерлері қауымдастығы

Уикипедия — ашық энциклопедиясынан алынған мәлімет
Jump to navigation Jump to search

Қазақстан қаржыгерлері қауымдастығы (ІІІ) – қаржы-несие ұйымдарының бірлестігі. 1997 ж. құрылған. ІІІ-ға 224 ұйым мүше (2007). Олардың қатарында банкілер, сақтандыру ұйымдары мен брокерлер, жинақтаушы зейнетақы қорлары, зейнетақы активтерін басқарушы ұйымдар, бағалы қағаздар нарығына басқа да кәсіпқой қатысушылар, лизингілік компаниялар, кішігірім қаржы ұйымдары, аудиторлық және консальтингілік ұйымдар бар. ІІІ-ның жоғары органы – Қауымдастық мүшелерінің жалпы жиналысы. ІІІ-ның басқару органы – Қауымдастық кеңесі, оның қызметкерлер құрамын ІІІ мүшелерінің жалпы жиналысы белгілейді. Кеңес төрағасы Қауымдастықтың атқарушы органы болып табылады. Қауымдастықтың аппараты банк секторы жөніндегі, бағалы қағаздар нарығы және зейнетақы секторы жөніндегі, сақтандыру секторы және бейбанкілік қаржы ұйымдары жөніндегі дирекциялардан құралады. ІІІ-ның негізгі стратегиялық және тактикикалық міндеттері – мемлекеттік органдар мен басқа да органдарда ІІІ мүшелерінің және қаржы нарығы субъектілерінің ортақ мүдделерін білдіру және қорғау, олардың қаржы секторын дамытудың басым және көкейтесті мәселелерін шешу жөніндегі ұсыныстарын жинақтап талдау жасау, қаржы нарығына заңнаманы жетілдіру жолында мемлекеттік органдармен өзара іс-қимылда әрекет ету. ІІІ мүшелерінің жинақталған ұсыныстары Қазақстан Қаржы қадағалау агенттігі мен Ұлттық банкін, ҚР Үкіметі мен Парламентін қоса, тиісті мемлекеттік органдарға енгізіледі. ІІІ өкілдері мемлекеттік органдардың жанынан құрылатын жұмыс топтарына, комиссияларға, кеңестерге қатысады. Халықаралық валюта қорының, Дүниежүзілік банкінің және басқа қаржы ұйымдарының өкілдерімен бірқатар конференциялар мен семинарлар, ресми кездесулер ұйымдастыру шараларын жүргізді. [1]

Сілтемелер[өңдеу]

Дереккөздер[өңдеу]

  1. «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл. ISBN 5-89800-123-9, X том