Қайранбай Жұмабай Қожақынұлы

Қайранбай Жұмабай Қожақынұлы (1948 жылы туылған) — қазақстандық педагог, баспагер, ақын-жазушы. 1967 жылы Алматы облысы, Ұйғыр ауданы, Үлкен Диқан ауылында «Октябрь» атындағы орта мектепті бітірген. 1967—1969 жылдары Кеңес Әскері қатарында қызмет еткен. 1975 жылы Қазақ мемлекеттік университетінің филология факультетін бітірген.

1975—1976 жылдары Алматы облысы, Еңбекшіқазақ ауданы, Рахат ауылындагы сегіз жылдық мектепте мүғалім, 1976—1994 жылдары «Мектеп» баспасында кіші редактор, редактор, аға редактор, қазақ тілі мен әдебиеті редакциясының меңгерушісі, 1994—1998 жылдары «Білім» баспасында шығармашылық топтың жетекшісі болып қызмет еткен.

1998—2020 жылдары «Атамұра» баспасында жетекші редактор болып қызмет еткен және республикамыздағы жаңа буын төл оқулықтарды дайындау мен басып шығару ісіне еңбек сіңірген. Сонымен бірге мемлекеттік тіл — қазақ тілін үйренушілерге арналған оқу кұралдарын шығаруга ғылыми, мәдени, көркем әдеби басылымдардың сапалы шығуына да зор үлес қосып келеді. Өмірінің 43 жылын баспа қызметіне арнаған. Жүздеген кітаптардың редакторы ^{[дереккөзі?]}.

Баспагер Жұмабай Қайранбай «Араб тілін оқыту методикасы», «Арабша-қазақша сөздік», «Арабша-қазақша филологиялық терминдер сөздігі», «Мұқағали Мақатаев. Өлеңдер» (көлемді алғы сөз жазылған хрестоматиялық жинақ), «Абай. Шығармалар» (хрестоматиялық жинақ) атты анықтамалық, әдістемелік және оқу құралы сипатындағы кітаптары басылып шыққан. Поэзия жанрында «Өлеңім балам, көзіңді аш», проза жанрында «Әке» (ғұмырнамалық повесть), «Қайдасың, Хантәңірі» (хикаяттар мен әңгімелер), «Бәтима» (повесть және әңгіме), «Күреңжорға» (повестер мен әңгімелер), «Біз студент едік» (повестер мен әңгімелер), «Өмір-керуен» (хикаят), «Тұлпарлар дүбірі» (повестер мен әңгімелер), «Өнермен өрілген өмір» (хикаят), «Ақбөрте» (хикаяттар мен әңгімелер), «Хантағы Қаратаудың құшағында» (ғүмырнамалық хикаят), «Жұлдызжирен» (хикаяттар мен әңгімелер) деп аталатын кітаптары жарық көрген. Көркем шығармаларында негізінен адам жанының ішкі иірімдерін тереңнен толғап жазуымен ерекшеленеді.