Қалкен Жәмінов

Қалкен Жәмінов (27.4.1926, Павлодар облысы Баянауыл ауданы Күркелі ауылы Үрпек қыстауы - 30.3.2004, Алматы қаласы) - геология-минерал, ғылым кандидаты (1965), профессор 1951 жылы Алматы тау-кен институтының геологиялық барлау факультетіне түседі де оны бітіргеннен кейін геолог ретінде далалық кен барлау жұмыстарымен айналысады. 1959 жылы Қазақстан Ғылым Академиясының Геологиялық ғылымдар ғылыми-зерттеу институтының директоры Қаныш Сәтбаев оған Жезқазған кенінде аса қымбат рений элементінің барын, алайда оның әзірге анықталмай отырғанын айтып, соны түпкілікті зерттеп, дәлелдеу үшін Жезқазған зертханасына барып жұмыс істеуді ұсынады.

Екі жылдан кейін Сәтбаев оны тағы да шақырып алып, КСРО Ғылым Академиясының рений элементі жөнінде үлкен ғылым басқосу болғанын, бұл бағытта маман жоқтықтан республикадан ешкімнің де қатыса алмағанын, енді ол маманның барын, ол - осы тұрған Жәмінов екенін айтып, рений жөніндегі Бүкілодақтық ғылыми мәжіліске қатысуга аттандырады. Мәскеу қаласынан оралғаннан кейін академик Сәтбаев оған симпозиумда республика атынан жақсы да мағыналы сөйлегені үшін алғыс жариялайды. Сөйтсе, Сәтбаев ренийдің қазақстандық маманының Мәскеудегі іс-қимылын сұрастырып отырған екен.

Жәмінов «Жезқазған кеніндегі рений геохимиясы» деген тақырыпта кандидаттық диссертация қорғап, геология ғылымының жаңа бір бетін ашады. Ол өзінің осы ғылым еңбегін ұстаз-ағасы Сәтбаевқа арнайды. «Қазақ энциклопедиясын» құрастырған авторлар ұжымының мүшесі. Баянауылдағы Қаныш Сәтбаев мұражайының ашылуы кезінде Алматыдан өзінде сақталған Сәтбаевтың кен тастарын, құнды жәдігерлерін, өзі түсірген фотосуреттерді әкеліп, мұражай қорын қалыптастыруда мол үлесін қосты. Көптеген ғылыми мақалалар мен бірқатар монографиялардың авторы. Бірнеше ордендермен, медальдармен мапаратталған.