Қара Оспан Бейсенбіұлы

Қара Оспан Бейсенбіұлы (1872, Буыршын, Алтай аймағы, ҚХР - 1916, сонда) - Абақ керей руының биі. 1896 жылдан бастап әкесінің орнына би болып сайланған. Тарбағатай мен Алтай аймағын билеген Қытай губернаторы өзі отырған Шәуешек қаласын қоршап қамал тұрғызу үшін қазактардан тегін жұмыс күшін алып тұрған. Алтай қазақтарынан 500 адам алу жөнінде жарлық түсіргенімен, керей билері адам беруден бас тартқан. Қара Оспан губернаторға: «1791 жылы қытай императоры мен Көгедай төре арасындағы келісім бойынша біз ақ күміс, мал және аң терісі түрінде салық төлейтін болғанбыз. Адам беру жөнінде келісім болған емес.Сондықтан қорғанның шығыны үшін тек малмен ғана салық төлейміз», - деп қарсы шыққан. Қытай әкімі оны көндіру үшін абақтыға жауып күн сайын екі рет басына қара ноқта кигізіп, аяғын шынжырлап, Шәуешек көшелерін аралатып қорлаған. Оны естіген Алтай елі көтеріліп, қарулы жасақ жияды. Қытай үкіметі Қара Оспанды босатуға мәжбүр болды, есесіне Алтай елі жылына 500 жылқы салық төлеп тұрған.