Қаржы есеп-қисабы

Қаржы есеп-қисабы – кәсіпорынның, ұйымның қаржы жағдайы, оның өзгерістері туралы арнаулы қарастырылған ережелер бойынша есептеме нысандары түріндегі ақпарат, яғни олардың бухгалтерлік теңгерімді, қаржы-шаруашылық қызметтің нәтижелері туралы, ақшалай қаражаттың қозғалысы туралы есепті, оған түсініктеме жазбаны және басқа қосымша ақпаратты, кестелерді, диаграммаларды қамтитын есептемесі. Шоғырландырылған есептеме (серіктестіктің есептемесі) және жекелеген есептеме (серіктестіктің әрбір мүшесінің есептемесі) түрлеріне бөлінеді. Сыртқы пайдаланушылар (инвесторлар, әріптестер, мемлекеттік органдар, т.б.) үшін құрамы, құрылымы және мазмұны халықар. стандарттардың талаптарын ескере отырып әзірленген нормалармен (ережелермен) айқындалады. Қаржы есеп-қисабы толық болуға тиіс, яғни онда ұйым қаржысының белгілі бір күнгі және келешектегі жай-күйі туралы бүкіл елеулі ақпарат, жұмысының оң нәтижелері де, теріс нәтижелері де мүліктің, капиталдың, міндеттемелердің нақты жай-күйі де көрсетілуге тиіс. Қаржы есеп-қисабының растығы міндетті түрде тексерілуге тиіс ұйымдардың есеп-қисабы нысандарының құрамында аудиторлық қорытындылардың болуымен қуатталады. Ол міндетті түрде статистика органдарына беріледі, мұның өзі оны сыртқы пайдаланушылар үшін ашық етеді. Сыртқы пайдаланушыларға арналған Қаржы есеп-қисабы базалық үш нысаннан тұрады, олар: бухгалтерлік (қаржылық) теңгерім нысаны, пайда мен залал туралы есептеме нысаны, ақшалай қаражаттың қозғалысы туралы есептеме. Ішкі пайдаланушыларға (ұйымның басшыларына) арналған Қаржы есеп-қисабы қызметтің салалық ерекшеліктері мен ұйымның есеп саясатында көзделген нысандарда болады. Инвестиц. ин-ттардың, акционерлік қо-ғамдардың, бюджеттен тыс сақтандыру ұйымдары мен басқа да кейбір ұйымдардың қаржы есеп-қисабында есеп-қисаптың арнаулы заңнамамен айқындалатын арнаулы нысандары мен қосымша көрсеткіштері болады. ^[1]