Қатысушы:Дәулет Рахманқұл/зертхана
Темірғали Әбілдаұлы Көкетай (25 наурыз 1938 жылы Қарағанды облысы Жаңаарқа ауданы Жеткеншек ауылы) - ғалым. Физика-математика ғылымдарының докторы, профессор. Ғылым және техника бойынша халықаралық Сократ сыйлығының лауреаты (2010 ж.), Қазақстан Республикасының тәуелсіздігіне 20 жыл мерекелік медалімен марапатталды.
Жалпы мәліметтер[өңдеу | қайнарын өңдеу]
Жеткеншек ауылында бастауыш мектепті бітіріп, 1951-1957 жж. Алматы қаласындағы №12 мектеп-интернатта оқыған. Мектепті бітірген соң Жаңа арқа ауданының Жеткеншек ауылында екі жыл шопан болып жұмыс істеді.
1959 жылы Алматыдағы Абай атындағы Қазақ педагогикалық институтының (қазіргі Абай атындағы Қазақ ұлттық педагогикалық университеті) физик-математика факультетіне түсіп, 1964 жылы физика және жалпытехникалық пәндер мамандығы бойынша аяқтады. 1964 жылы Абай атындағы КазПИ-ге стажер-зерттеуші, 1966 жылы аспирантураға алынып Тарту университетіне (Эстония ССР) командировкаға жіберілді. 1970 ж. Тарту мемлекеттік университетінің докторлық диссертациялар қорғайтын Маманданған Ғылыми Кеңесінде "Мыс және күміс иондарының сілтілі-галоидтық кристалдардағы люминесценция орталықтарының табиғаты" туралы мәселе бойынша физика-математика ғылымдарының кандидаты ғылыми дәрежесін алу үшін диссертация қорғады. 1988 жылы "Әртүрлі модификациядағы активацияланған иондық кристалдағы люминесценция және электрондық қозулар" тақырыбында Оралдың мемлекеттік политехникалық институтында (қазіргі Екатеринбург политехникалық университеті) физика-математика ғылымдарының докторы дәрежесін алу үшін диссертация қорғады.
Еңбек жолы[өңдеу | қайнарын өңдеу]
1969-1972 жылдары аралығында КазПИ-де аға оқытушы, доцент, физика факультеті деканының орынбасары.
1972 жылы Жоғары оқу министрлігінің бұйрығы бойынша жаңа ашылған Қарағанды мемлекеттік университетіне Қатты дене физикасы кафедрасының меңгерушісі.
1989-1994 жылдары ҚарМУ-дің физика факультетінің деканы, 1994-1997 жж. университеттің ғылым жөніндегі проректоры.
1997-2008 жылдары Қатты дене физикасы кафедрасының меңгерушісі.
2008 жылдан қазірге дейін ҚарМУ-дің "Техникалық физика және экология мәселелері" ғылыми-зерттеу институтының директоры.
Марапаттары және атақтары[өңдеу | қайнарын өңдеу]
1981 ж. СССР космонавтика федерациясының ұшқыш-ғарышкер Ю.А.Гагарин атындағы медальмен наградталды.
1982 ж. Жоғары білім министрлігінің Құрметті грамотасымен наградталды.
1983 ж. Бүкілодақтық "Білім" қоғамының "За активную работу" белгісімен наградталды.
1983 ж. Жоғары білім министрлігінің Құрметті грамотасымен наградталды.
1999 ж. Халықаралық биографиялық орталық (Кембридж, Англия) "ХХ ғасыр ғұламасы" деген атақ берілді. "ХХ ғасырдың аса көрнекті қайраткерлері" деген кітапқа өмірбаяны жазылып, күміс медаль тапсырды.
1999 ж. Қазақстан Республикасының Білім және Ғылым Министрлігі Құрмет грамотасымен марапаттады.
2001 ж. Халықаралық биографиялық орталық "2001 жылдың Халықаралық ғалымы" деген атақ беріп, аты-жөні жазылған алтын медаль мен диплом тапсырды.
2002 ж. "Ғылым мен техниканың дамуына қосқан аса зор үлесі үшін" Қазақстан Республикасының мемлекеттік стипендиясы тағайындалды.
2007 ж. Қазақстан Республикасының Білім және Ғылым министрлігі жас ұрпақты оқыту және тәрбиелеу ісіндегі елеулі табыстары үшін Ыбырай Алтынсарин атындағы медальмен марапатталды.
2008 ж. "Жоғары оқу орнының үздік оқытушысы" грантының иегері.
2009 ж. Білім беру саласындағы ерекше еңбегі үшін "Қазақстан Республикасының білім беру ісінің құрметті қызметкері" белгісімен марапатталды.
2010 ж. Ғылым және техника бойынша халықаралық Сократ сыйлығының лауреаты.
2010 ж. Қарағанды қаласының дамуына қосқан зор үлесі үшін "Замандас-2010" 3-қалалық конкурстың "Ғылым мақтанышы" номинациясы бойынша жеңімпазы.
2011 ж. "Қазақстан Республикасының тәуелсіздігіне 20 жыл" мерекелік меделімен марапатталды.