Қатысушы:Нұрсұлтан Ғабдуллаұлы/Әмин Ахун Құлшарұлы
Әмин Ахун Құлшарұлы (Шегем Әмин) – 1889 жылы Ақтөбе облысы, Байғанин ауданына қарасты Желтау өңірі, Егінді бұлақ «Ақ кетік» деген жерде шаруа отбасында дүниеге келген. Қазіргі кезде сол жерде Шегемнің атақты діни қызметкері Ахун Жәуперұлы Қайырмұхамбет (1864-1916) ж.ж. жерленген. (Ахун (аханда) - парсы сөзі, қазақша «оқымысты, ғұлама» деген мағына беретін діни атақ). Жас кезінен білімге құштар, оқуға зерек бала Әмин Желтау жерінде Қайырмұхамбет ахунның қолында білім алып, мешітте Қараш Ыбырайым Құлбайұлымен бірге оқыған. Қайырмұхамбет ахун Әминнің ерекше қабілетін ескеріп, Бұхара қаласындағы медресеге жолдама берген. Сол медресені жақсы оқып құтарғаннан соң Әмин «Ахун» атағына ие болып, елге оралған. Ел ішінде ағартушы ретінде танылып, Халықты имандылыққа, адамгершілікке, ислам әлемінің парасатты, көрегенділік тәрбиесі, мәдениетіне баулыған педогог-ағартушы азамат деңгейіне көтеріліп, ел құрметтеген азамат ұстаз болған. Кеңес өкіметі молда ахундарды қудалаған кезде Хорезм ойына Бесқалаға көшіп, өмірінің соңына дейін Хожелі қаласында тұрған. Әмин ахун әңгімеге сараң, көп сөйлей бермейтін, сұрақ қойсаң ғана жауап беретін, шариғатты жақсы білетін, барға аспай, жоққа саспайтын, өте қанағатшыл, табиғатында қарапайым, кішіпейіл, қайырымды адам болған деседі. [1]Кеңес уақытында сауаттылығының арқасында колхозда бухгалтер қызметін де атқарған. 1953-1954 жылдары Хожеліде Пірім Ишанның мешітін қайта тұрғызуға Мәскеу мен Ташкентке хат жазуға көмектескен.[2]
Замандастары Қырықмылтық Көшербай, Шегем Әби, Қараш Ыбырайым, Шоңай Шойхы ахундармен жақсы араласқан. Бірін-бірі қатты құрметтеген. Ұрпақтары Алматы, Ақтау қалаларында тұрады. Өзі Хожелі қаласындағы Жүсіп Ишан зиратына жерленген.[1]