Қолданбалы саясаттану

Қолданбалы саясаттану – саясаттану ғылымының бір саласы.
Саяси мәселелердің даму тенденциясы мен механизмдерін зерттеу, саяси жағдайларды талдау, болжау принциптері мен әдістерін жасау, жобалау және сараптау, саяси процестерді басқару технологиялары мен жүйелерін жасаумен айналысады. Қолданбалы саясаттануда негізінен бихевиоризм методологисы мен әдістемесі қолданылады және эмпирика зерттеулерде социология, психология, т.б. ғылым салаларының әдістері кеңінен пайдаланылады.
Қолданбалы саясаттанудың өзіндік ерекшелігі оның мақсаттары мен түпкі нәтижесінен көрінеді. Егер теориялық саясаттану жаңа, әмбебап немесе құбылыстардың тұтас типтерін сипаттайтын жалпы, абстрактілі білім алуды мақсат етсе, Қолданбалы саясаттану, негізінен, оқиғалар өрбуінің қысқа мерзімді болжамдарын жасауға, саяси процеске қатысушыларға нақты ұсыныстар беруге ұмтылады. Қолданбалы саяси зерттеулермен теоретиктер ғана емес, кәсіби сарапшылар, имиджмейкерлер, саяси қайраткерлердің кеңесшілері және нақтылы саясатқа қатысы бар өзге тұлғалар да шұғылданады. Қолданбалы зерттеулер, әдетте, мемлекеттік органдардың, партиялардың, қоғамдық ұйымдардың, сайланбалы қызметтерге үміткерлердің және өзге саяси субъектілердің тапсырысымен жүзеге асырылады. Қолданбалы саясаттану нақтылы саяси шешімдерге ғана емес, кейде мемлекет стратегиясына да айтарлықтай әсер етеді.