Құдайқұлов Мұхтар Кәрімұлы

Құдайқұлов Мұхтар Кәрімұлы (1950-1992) 1950 жылы 13 қаңтарда Қостанай облысының Камышин ауданы, Туфановка селосында туған. Камышин орта мектебін 1967 жьлы бітірген, 1970 жылы Қазақ мемлекеттік С.М.Киров атындағы университетінің журналистика факультетіне түсіп, оны 1975 жьлы ойдағыдай тәмамдаған.

1973-1983 жылдары Қазақ ССР баспа және полиграфия ісі жөніндегі мемлекеттік комитеті төрағасының көмекшісі болып істеді. 1983 жылы республикалық "Мектеп" баспасының жоғарғы оқу орындары әдебиеттер редакциясының бас редакторы болды. 1985 жылдан бастап Қазақ ССР Министрлер Кеңесі іс басқармасының білім, мәдениет және денсаулық бөлімінің бас маманы қызметін атқарды. 1990 жылы жаңадан ашылған республикалық "Ана тілі" баспасының директоры болып тағайындалды.

М.К.Құдайқұлов іскер ұйымдастырушы болды. Ол "Ана тілі" баспасының аяғын нық басып кетуіне көп еңбек етті. Осы жылдары оның баспагерлік, ұйымдастырушылық қабілеті жарқырай көрінді. Оның ізденімпаз, іскер басшылығымен жаңа баспаның шығармашылық ұжымы қалыптасты, баспадан шығатын әдебиеттердің кең ауқымдағы кешенді жоспары жасалынды, тақырыптық бағыты қалыптасты.