Құл-Мұхаммед Рақымғали Абрарұлы

Құл-Мұхаммед Рақымғали Абрарұлы (1967 жылы туған, Абай облысы, Үржар ауданы, Мақаншы ауылы) – баспагер, «Атамұра» корпорациясының президенті. Философия ғылымдарының кандидаты. Үржар ауданының Құрметті азаматы.

Р.А. Құл-Мұхаммед 1994 жылы С.М. Киров атындағы Қазақ Мемлекеттік университетін, 1998 жылы Абай атындағы Алматы Мемлекеттік университетін бітірген. 1994–1997 жылдары Қазақстан Республикасы Президенті әкімшілігінде жауапты қызметтер атқарды. 1997–2009 жылдары «Атамұра» корпорациясының бірінші вице-президенті болды. 2009 жылдан бастап «Атамұра» корпорациясының президенті.

«Қазақстан Республикасының еңбек сіңірген қайраткері» атағымен (2008), бірнеше медальдармен, Білім және ғылым министрлігінің Грамота, Алғыс хаттарымен, еліміздің «Жомарт жүрек», «Жыл тұлғасы» дипломдарымен марапатталған.

Рақымғали Абрарұлы отандық баспа және полиграфия ісінің дамуына, тәуелсіз Қазақстанның алғашқы жаңа буын, төл оқулықтарын басып шығаруға зор үлес қосты.

Білікті маман, іскер ұйымдастырушы Р.А. Құл-Мұхаммед жаңа жобалар мен озық менеджмент әзірлемесін ұдайы өндіріске енгізіп, еліміздің мәдени және гуманитарлық салаларына демеушілік көрсетуде де белсенділік танытып келеді. Корпорация жас ғалымдар мен студенттерге, озат оқушыларға шәкіртақы, ұстаздарға сыйақы, жыл сайын әдебиет пен өнер саласындағы үздік шығармаларға, білікті мамандарға ынталандыру сыйақыларын табыс етуді дәстүрге айналдырған.

Рақымғали Абрарұлы басқаратын «Атамұра» корпорациясы – ұлттық спорт, діліміз бен тіліміз, ғылым-білім, әдебиет пен мәдениеттің үлкен жанашыры. Ұлттық айтыс пен дәстүрлі ән өнерінің одан әрі жаңғыруына да айрықша еңбек сіңірді. Қазақтың белгілі қаламгері М. Әлімбаев, Ә. Нұршайықов, Ш. Мұртаза, Қ. Мұхамеджанов, Т. Медетбек, Иран-Ғайып, С. Ақсұңқар, Т. Әбдікәкімұлы, Н. Айтұлы, З. Ахметова, С. Нұржан, А. Әлімұлы, К. Сегізбай т.б. шығармалары «Атамұраның» өз қаржысымен басылып шықты. 2002 жылдан «Атамұра» кітапханасы» сериясымен көркем әдебиет шығару жүзеге асырылып келеді. Осы сериямен Қазақстанның көрнекті ақын-жазушыларының 200-ден астам шығармасы жарық көрді.

Рақымғали Абрарұлының өндіріске енгізген жаңа жобасы бойынша «Менің алғашқы кітапшам» сериясымен қазақ және орыс тілдерінде 50-ден астам түрлі түсті суретті ертегі кітаптар, «Мектеп энциклопедиясы» сериясымен мектеп жасындағы балаларға арналған Қазақстанның жануарлар, құстар мен өсімдіктер әлемі жайлы танымдық басылымдар және «Атамұра» мектеп кітапханасы» сериясымен қазақтың классикалық, сонымен қатар заманауи балалар әдебиетінің туындылары басылып шықты.

«Атамұра» корпорациясында дайындалып, жарық көрген қазақ халқының салт-дәстүрлері мен әдет-ғұрыптары, дастарқаны туралы қазақ, орыс, ағылшын тілдерінде «Қазақтың салт-дәстүрлері мен әдет ғұрыптары», «Қазақы дастарқан» («Қазақтың ұлттық тағамдары»), «Қазақ тазысы» атты әсем безендірілген кітаптар мен ағылшын және неміс, жапон тілдерінен аударылған «Заһир», «Білімдар», «1000 пайдалы сөз», «1000 негізгі сөз», «Кішкентай ханзада», «Маған әже керек», «Таңғажайып глобус», «Сиқырлы орындық» т.б. басылымдар отандық мәдениетіміздің өркен жаюына қосылған бағалы үлес болып табылады. Сондай-ақ Рақымғали Абрарұлы өзінің туған өлкесінен шыққан қаламгерлердің де жүзге тарта кітаптарын шығарып берді. Өзі білім алған Мақаншы ауылы Ә. Найманбай атындағы орта мектепке мұражай салдырып, ұстаздарға автокөлік, оқушыларға компьютерлер мен оқу құралдарын сыйлады. Аудандық емханаға лифт орнатып, пандемия кезінде туған ауылына қомақты қаржы бөліп, коронавирус дертінен емдейтін дәрілер мен қорғаныс жабдықтарын жеткізіп берді. 2022 жылы Мақаншы ауылындағы мектептің шебер мұғалімдері мен үздік оқушыларына 10 млн теңге көлемінде сыйақы табыс етті.

Егемен еліміздің баспа және полиграфия саласын дамыту, мәдени және гуманитарлық салаларына қайырымдылық пен демеушілік қызметі үшін Рақымғали Абрарұлы жетекшілік ететін «Атамұра» корпорациясы Қазақстан  Республикасы Президентінің «Құрмет» дипломымен, «Еліміздің ең үздік баспасы» жүлдесімен, АҚШ және Еуропа елдерінің арнайы дипломдарымен, Халықаралық сертификаттармен марапатталды. Оның қатарында өндіріске ықпал ету ассоциациясының Алтын медалі (Париж), Халықаралық Алтын Жұлдыз (Женева), «Хрусталь рыцарь» дипломы (Мальта), Халықаралық «Quality Summit» дипломы (Нью-Йорк) бар.

Қазақстанның еңбек сіңірген қайраткері, баспа және полиграфия ісінің білікті маманы Рақымғали Абрарұлы отандық баспа ісін ілгері дамытуда және гуманитарлық-мәдени салада іргелі жобаларды жүзеге асыруда үлкен үлес қосып келеді.