Ұшу жылдамдығы

Ұшу жылдамдығы (Скорость полета) — ұшақтардың ұрыстық қасиеттерін сипаттайтын негізгі фактор. Ұшу жылдамдығының жоғарылығы ұшақтың нысана үстіне тұтқиылдан жетуіне мүмкіндік береді, қарсыластың аумағында болуы уақытын қысқартады, өзін әуе шабуылына қарсы қорғаныс құралдарымен жою ықтималдығын азайтады. Ұшу жылдамдығының артықшылықтары экипаждың әуе шайқасында және басқа міндеттерді орындауда инициативамен басым түсуіне мүмкіндік береді. белгілі бір ұшактың Ұшу жылдамдығы оның қозғалтқышының (қозғалтқыштарының) күшіне, аэродинамикалық сипаттарына және ұшу салмағына байланысты болады. Әдетте, жоғары жылдамдықты қарсыластың әуедегі ұшақтарын және басқа да әуе шабуылы құралдарын жоюға арналған жойғыш ұшақ, әсіресе тосып алушы-жойғыштар игере алады. Ұшу жылдамдығының бірқатар мәнін ажырата білу керек, олардың негізгілері: ұшудың ең жоғарғы жылдамдығы қозғалтқыштарының толық куатпен жұмыс істеуі арқылы қол жеткізілетін (тарту күшіндегі), көлбей ұшу жылдамдығы; ұшудың төменгі жылдамдығы — қозғалтқышының ең төменгі тарту күші арқылы ұшаққа көлбей ұшу мүмкіндігін беретін жылдамдық; ең алыс қашықтықтыққа көлбей ұшу жылдамдығы әуе жолының әрбір километріне жанармай аз шығындалатын жылдамдық; ең ұзақ ұшу жылдамдығы — уақыт бірлігіне шакқанда жанармай ең аз жұмсалатын жылдамдық. Ұшу жылдамдығының ең жоғарғы және ең төменгі шамалары арасындағы айырмашылық жылдамдық диапазоны деп аталады.