Әдебиет майданында

«Әдебиет майданында» («На литературной стройке»), Мұхтар Әуезовтің мақаласы. 1934 ж. «Литературный Казахстан» газетінің мамырдағы санында шыққан. Әуезовтің орыс тілінде жазылған мақалаларының ішіндегі тілі өте көркем, ширақтығымен көзге түседі. 30-жылдардың алғашқы жартысындағы қоғамдағы қазақ әдебиетіндегі саяси-әлеуметтік, идеологиялық ахуалды айқын байқайтын, әдебиетті, әлеуметтік жағдайды терең түсінетін жазушының заман тынысына қарай амалсыз мойынсуна отырып жазылған мақаланың үлгісі. Әйтсе де қызыл сөз, ұранды үгіт, көсемдерді дәріптеу жоқтың қасы. Мақала жазушының жартылай түземдік қалалық мектепте оқып жүрген кезінде классикалық орыс әдебиетінен білетін тыныш орыс деревнясы мен «құдайға қараған» орыс шаруасының қалпы шын өмірде мүлде ондай емес болып шыққанын айтудан басталады. Бугінгі қазақ жастарының сана-сезімі аз жылдардың ішінде ғасырлар ғана өзгерте алатын дәрежеде өскенін айтып, бұрынғы әдебиетке қарсы пролетарлық орыс әдебиетінің кейбір үлгілерін мысалға алған. Көркем шындық жайында идеологиялық талаптар тұрғысынан ойлар, жазушылардың өмірдің, қоғамның дамуына ілесе алмай жатқанын айтқан. Мақалада өзінің колхоз, интернационализм тақырыбына арналған екі пьеса және бір повесть жазып жатқанын еске салған. Сонымен қатар бұрыннан жазып жүрген тарихи тақырыпты жалғастыра беретінін еске салған. Мақаланың соңында Бүкілодақтық Кеңес жазушылары одағының ұйымдастыру комитетінің І-пленумының жазушыларға қойған шығармашылық талаптарына сәйкес, оларды өнімді еңбек етуге шақырған.