Ән айтысу

Ән айтысу - қыздар мен жігіттердің екі топқа бөлініп, кезекпен ән айтып жарысып, көңіл көтеруі. Үйлену салтында қалыңдық ойнауға барған жігітке, ере барған жолдастарына дәм таттырған соң келесі рәсімдерге кезек беріледі. Қалыңдықты көрші ауылдың адамдары алып кетіп жасырады. Қыз-келіншектер киіз үй ішінде қалып, жігіттер киіз үйдің сыртына шығып отырып, ән айту сайысына түседі. Кезектесе әнмен айтысып, қарсы топты сүріндіруге барын салады. Дарын мен қарымы сынға түсер сын сағатта суырып салмалық өлең шумақтарының айшықты үлгілері туады.

Жігіт:

Жар бола гөр Жасаған, 
Үйір ем қызға жасымнан. 
Кездойсоқ тойға келген ем, 
Үлгере алмай басынан.

Қыз:

Құдайым, өзің қолдай гөр, 
Өйткені сенің құлыңмын. 
Жарқырап тәжі тағы тұр, 
Шағшардан хан ұлының.

Жігіт:

Базарда сатып алған күміс құман,
Ән айтпай мен де босқа қарап тұрман.
Менімен айтысатын қыздар қайда,
Күн сайын бола бермес мұндай думан.

Қыз:

Шаршамай, ауқаттанып келіп пе едің?
Даусыңның жаңылмай-ақ танып тұрмын.
Көрмегелі мен сені айлар өтті.
Жүрсің бе аман-есен, бақ-дәулеттің?

Әдетте күйеу жігіттің жолдастары қалыңдықты жасырып отырған қыздар тобынан жеңілген сыңай танытып, ән айтысуының соңында қыздар тобына сыйлық кәде беріп аяқтайды. Ән айтысу дәстүрлі этномәдени ортаның ең маңызды компоненттерінің бірі болды. Көшпелі социумның қалыпты функциясының алғышарты информациялық байланыс (орыс. инфосвязъ) пен информациялық өрістің {орыс. информационное поле) қажетті тығыздығын қамтамасыз ететін іргелі факторлардың қатарына жатады