Әскерді басқару

Әскерді басқару (Управление войсками) — штаб, саяси бөлім және т.б. басқару органдары басшыларынын (командирлерінің, бастықтардың) әскерді (қарулы күштерді) үнемі әскери дайындықта ұстап, алға қойылған міндеттерді орындауға және ұрыс қимылдарын жүргізе білуге дайындауға басшылық жасауы. Оған болуы мүмкін жағдай жөнінде үнемі мәліметтер табу, жинау, алдын ала зерттеп, талдау жасау, операция (ұрыс) кезінде шешім қабылдау, қарамағындағыларға әскери міндетті жеткізу, операцияны (ұрысты) жоспарлау, өзара бірлесіп қимыл жасауды ұйымдастыру, әскер мен штабты әскери кимылдар жүргізуге әзірлеу және оған тікелей басшылық жасау, әскерді басқару жүйесін құру, қарамағындағы командирлерге, штабқа, әскерге бақылау жасау мен көмек ұйымдастыру, т.б. жатады. Әскерді басқаруды қолбасшы (командир, басшы) тікелей немесе штаб, орынбасарлары, әскер түрлері басшылары, арнайы әскер және кызмет арқылы бұйрық, директива, өзінен жоғары тұрған басшылардың жарлығы түрінде жүзеге асырады. Әскерді басқарудың негізгі принциптері дара басшылық; барлық белімдерді бір орталықтан басқару, соның ішінде бағыныштылардың алдына қойылған міндетті орындау барысында жеке бастама көтеруіне мүмкіндік беру, шешім қабылдау кезінде табандылық пен батылдық көрсету; жағдай өзгеруіне қарай тез шешім шығару; құпиялық пен үзіліссіздік; қолбасшылық (командир, басшы) қабылдаған шешімге қол астындағыларды алға койылған міндеттерді орындауға пайдалануы мен оның нәтижесіне (қарай) тікелей жауапкершілігі; Әскерді басқаруды жүзеге асыру үшін басқару жүйесі құрылып, оған басқару органдары, басқару пункттері, байланыс жүйесі, Әскерді басқаруды автоматтандыру жүйесі, және т.б. арнайы жүйелер кіреді.