Әскери жолдар

Әскери жолдар (Военные дороги) — әскердің ұрыс қимылдарын жүргізуіне (бөлімшелер мен бөлімдердің қозғалысына, тасымалға, эвакуацияға) арналған жолдар. Әскери жолдарға әскери аудандардағы дайындалған жолдар мен әскери автомобиль жолдары жатады. Тылда дайындалатын әскери жолдар мен лек жолдары: бағытына қарай — майданға бағытталған майдандық жол және майдан бойындағы рокадалық жол болып бөлінеді. Мақсатына қарай — негізгі (маневрлік), тасымалдайтын, эвакуация жолдары және көмекші (айналма жол, косалқы жол) жолдар, қатысына қарай батальондық, полктік, дивизиялық және т.б. жолдар болады. Әдетте әскери жолдар дөңгелекті машиналардың жүруі үшін дайындалады. Сонымен қатар шынжыр табанды машиналарды өткізу үшін лек жолдары салынады.