Әскерлерді тасымалдау

Әскерлерді тасымалдау (Перевозка войск) — әр түрлі көлік түрлерін қолдана отырып, бір ауданнан (пункттен) екінші ауданға әскерлерді, командаларды, жеке әскери қызметшілерді, әскери жүктерді тасымалдау. Ол әскери басшылық жоспары бойынша жүзеге асырылады. Өзінің міндет-максаты мен аукымына байланысты стратегиялық, оперативтік немесе тактикалық болуы мүмкін. Әскерлерді тасымалдау арналуына байланысты жұмылдырулық, операциялык, жабдықтық, эвакуациялық, жеке құрамдық болып бөлінеді. Жұмылдырулық әскерлерді тасымалдауға жұмылдыру кезінде әскери бөлімдер мен мекемелерді толықтыру және қамтамасыз ету үшін қажет адамдарды, әскери техника мен материалдық құрал-жабдықты тасымалдау жатады. Оперативті әскерлерді тасымалдауға әскери бөлімдер (құрамалар) мен бөлімшелерді (мекемелерді) тұрақты орналасқан аудандарынан белгіленген аудандарға, жаңа тұрақ орындарына, лагерлерге, оқу-жаттығуларға, стихиялык апаттармен күресуге тасымалдаулар жатады. Жабдықтық Әскерлерді тасымалдауға әскерлердің (күштердің) күнделікті тұрмысы мен ұрыс әрекетін қамтамасыз ету үшін материалдық құралдарды, әскери объектілерге қажет жүктерді және т. б. жүктерін тасымалдау қамтылады. Эвакуациялық Әскерлерді тасымалдауға жаралы және науқас әскери қызметшілерді, сонымен қатар жөндеуді қажет ететін әскери техниканы, қаружарақ пен әр түрлі әскери мүліктерді тасымалдау қамтылады. Жеке құрамдық Әскерлерді тасымалдауға шақырылушыларды және ҚК қатарынан босатылғандарды, жаттығуға, демалысқа, емделуге баратын командаларды тасымалдау жатады. Көлік құралдарының түріне байланысты Әскерлерді тасымалдау теміржолдық, су (теңіз, өзен), әуелік, автомобильдік және аралас тасымалдау болып бөлінеді.