Өтімді белдем

Өтімді белдем — өтімді қойнауқаттың бұрғылау ұңғымасына жапсарлас орналасқан, сондықтан да өз бойына жуғыштау сұйығының сүзбелерін сыздықтата енгізуге қабілетті бөлігі. Қойнауқатқа енген сүзбе ұңғыма оқпаны қабырғасынан қойнауқаттың ішкі өңіріне қарай шашақтала таралады және оның мөлшері оқпаннан қашықтаған сайын азая береді. Қойнауқаттың ұңғымаға жақын орналасқан бөлігі сүзбелену әсерінен қойнауқаттық флюидтен мүлдем ада болуға мәжбүр, бұл белдем "шайылу белдемі" деп аталады. Өтімді белдем электрлік каротаж әдістерімен меншікті кедергі мөлшерін өлшеу ісіне қатты әсерін тигізеді. Өтімді белдемнің диаметрі неғұрлым үлкен болса және аталған белдемнің меншікті электрлік кедергісі мен өзгермеген қойнауқаттың осы көрсеткіші аралығындағы айырма неғұрлым көп болса, сөз болған әсердің тиімділігі де солғұрлым мол болмақ.