Әбзәли Егізбаев

ЕГІЗБАЕВ Әбзәли (1907, Қармақшы ауданы Тұрмағамбет ауылы – 29.8.1945, Маньчжурия) – жауынгер ақын. Қызылорда педагогикалық училищесін бітірген (1934). Жалағаш ауданында, кейін Қызылтам мектебінде мұғалім, мектеп директоры қызметтерін атқарған (1933 – 1934). 1938 ж. жалған саяси айыппен жазаланып, Магадан облысы Колыма өзені бойында орналасқан «Одинокий», «Партизанский» алтын кен орындарында жұмыс істеді. 1941 жылы елге оралған. 1941 – 1942 ж. Жалағаш ауданы Жаңаталап мектебінің директоры болды. 1942 жылы әскерге алынып, алғаш Батыс майданда, кейін Шығыс майданда соғысқан. Елге қайтар жолда жапондар ұйымдастырған пойыз апатынан қайтыс болып, Маньчжурияда жерленген. Егізбаевтың алғашқы өлеңдері майдандық газеттерде («Суворовшы», «Жауға қарсы аттан», т.б.) жарияланған. «Жорық жолында», «Дат», «Мақсұт», «Төрт дә¬руіш», т.б. поэмалары бар (1943 – 1945). Ақын шығармалары кейін жиналып, «Жауынгер жүрегі» (1969), «Жыр-аманат» (1978), «Елімнің сырын еттім жыр» (1996) атты кітаптары жарық көрген.