Сенегал галагосы

Сенегал галагосы

Сенегал галагосы (лат. Galago senegalensis) - приматтар отрядына жататын сүтқоректі. Аяғының екінші саусағындағыдан өзге тырнақтары адам тырнағындай дөңгелене біткен. Екінші саусағындағы тырнағы - үшкір, галаго онымен басын, мойнын жүнін қасиды, құлақтарын тазалайды. Галагоның дене тұрқы - 130 см, құйрығының ұзындығы -15-41см. Салмағы - 95-300 грамм. Терісінің түсі күміс түстес сұрдан қошқыл қоңырға дейін барады. Жүні бұйра әрі қалың. Түнде белсенді болғандықтан галагоның көздері - үлкен және әдемі. Галаголар ағаштан-ағашқа секіріп жүреді. Олар өте саққұлақ. Ұшып келе жатқан жапалақ қанатының сыбдырына дейін естиді. Бір-бірімен он сегіз түрлі дыбыс шығарып хабарласады. Бұл дыбыстарды қызметі жағынан ашулану, қорғану және бір нәрсе туралы хабар беру деп 3 түрлі топқа бөлуге болады. Галаголар өте жылдам қимылдайды. Олар әуеде ұшып бара жатқан шегірткелер мен көбелектерді алдыңғы аяқтарымен ұстап жейді. Бұл кезде олар артқы аяқтарымен ағашқа жармасып тұрады. Жерден 5-12 метр жоғары жерге ұя салады. Күндіз бірге ұйықтайды , бірақ түнге қарай қорек іздеп, бөлініп кетеді. Галагоның көздері ұясынан қозғалмайды, сондықтан ол жемтік іздеп жүргенде басын үнемі әрі-бері бұрып жүруге мәжбүр. Шегірткелермен, ұсақ құстармен, жемістермен, ағаштардан аққан шырынмен қоректенеді. Шөпке түскен шықты, шұңқырларда тұнып қалған жаңбыр суын ішеді. Африканы, оның ішінде Сахара шөлінің оңтүстігін, Намибияны, Ботсвананы, Зимбабвені, Мозамбикті, Трансвааль мен Свазиландты, Занзиварды мекендейді.