Абд ул-Карим Бұхари
Абд ул-Карим Бұхари (18-ғасырдың 2-жартысы, Бұхара-1830, Константинополь) - тарихшы. Өмірі жөнінде мәлімет аз. Саяхат жасап, бірқатар елді аралаған. 1807-08 жылдары елшілермен бірге Константинопольге барған. Оның парсы тілінде жазған тарихи геогр. еңбегі 1873-1874 жылдары Мысырда басылып шықты. Еңбек француз тіліне аударылып, 1876 ж. Парижде "Орталық Азия (Ауғанстан, Бұхар, Хиуа, Қоқан) тарихы" деген атпен жарық көрді. Шығармада Орт. Азия жөнінде қысқаша геогр. мәліметтер берілген және Ахмед Шаһ Дуррани заманынан бастап, өз тұсына дейін осы елде болған тарихи оқиғалар баяндалды. Сонымен бірге Дешті Қыпшақ жерінен қазақтармен бірге мекендеген қарақалпақтар, Қазақстан мен Хиуаның сыртқы саяси байланысы, Хорезмді билеген қазақ хандары туралы құнды мәліметтер келтірген.