Абд-Рашид Абд-Расулович Юлдашев

Абд-Рашид Абд-Расулович Юлдашев. 1933 жылы 17 шілдеде Алматы қаласында туған. Ұйғыр. Н.В. Гоголь атындағы Алматы көркемсурет училищесін (1955); Мәскеу полиграфикалық институтының кітап графикасы факультетін бітірген (1974), басылым өнімінің суретші-көркемдеушісі. Суретші-график. «Гүлден, менің Қазақстаным», «Даланың атағы нанмен шықты», «Жерім менің, менің жерім» плакаттарының; «Ұйғыр халық ертегілері», «Үйғыр эпостарының жинағы» кітаптарының суреттемелерінің; «Ғасырлар тереңдігінен», «Темірдің тәубесі», «Бурабай», «Диляромның портреті» және т.б. картиналар топтамасының авторы. «Отқа оранған Вьетнам» Халықаралық саяси плакат конкурсының қатысушысы (1966). Қазақстанды Бүкілодақтық плакат конкурстары мен көрмелерінде өкілдік етті. Жеке көрмелерін өткізді (1964, 1995). Жұмыстары ҚР кітап мұражайында, Ә. Қастеев атындағы Мемлекеттік өнер мұражайында, Германия, Италия, Чехия, Болгария, Қазақстанның жекө коллекцияларында сақталуда. «Рашид Юлдашев. Кескіндеме және графика» (2004) репродукциялары бар альбом Луврдың көркем мұражайының кітапханасында (Франция), Рембрандтың үй-муражайында Амстердам қаласы (Нидерланд). 1955 жылдан - «Лениншіл жас», «Казахстанская правда» республикалық газеттердің суретші-көркемдеушісі. 1960 жылдан - «Қазақстан», «Жазушы» баспаларының суретшісі, бас суретшісі. 1974 жылдан - ҚазКСР министрлер Кеңесінің Мемлекеттік баспа комитетінің бас суретшісі. 1996-1999 жылдары - Т. Жүргенов атындағы Қазақ ұлттық өнер академиясының оқытушысы, «Кескіндеме» кафедрасының меңгерушісі. Бүкілкеңестік кітапты ең үздік көркемдеу конкурсының әділқазылар алқасының мүшесі. КСРО Суретшілер одағының мүшесі (1964 жылдан). КСРО Министрлер Кеңесінің жанындағы Мемлекеттік баспа комитетінің құрмет грамотасымен, КСРО Суретшілер одағы басқармасының дипломдарымен, «Қазақстандық миллиард» кітабын көркемдегені үшін 1 дәрежелі дипломмен марапатталған. Қазақстанның еңбек сіңірген мәдениет қайраткері (1994). Діни көзқарасы - ислам. Саяси қайраткер ретіндегі идеалы - Ф. Рузвельт. Қазақстанның болашағы туралы болжамы - «Заманауи төзімді қоғам» Хоббиі - гүл өсірушілік. Сүйіп оқитын әдебиеті - Л.Н. Толстой, В.В. Маяковский, С.А. Есенин. Үйленген. Жұбайы - Юлдашева Вера Михайловна, Қазақстанның Еңбек сіңірген мұғалімі. Қыздары - Гүлнара (1957 жылы туған), химия ғылымдарының кандидаты, Гуара(1975 жылы туған), экономика ғылымдарының кандидаты; ұлы - Ескендір (1962 жылы туған), бизнесмен.