Амантай Рақымжанұлы Сатаев

Амантай Рақымжанұлы Сатаев (25.10.1933, Ақмола облысы Ерейментау ауданы, "Ленинский" кеңшары, Шәкей ауылы - 18.07.2003, Алматы) - жазушы. Мәскеудің тарихи архив институтын бітірген. Ол әр жылдары "Советтік Қарағанды", "Жұлдыз", "Қазақ әдебиеті" сияқты газет-журналдарда қызмет еткен. "Қазақфильм" студиясының сценарий бөлімінде редактор болған. 1963 - 1967 жылдары Тың өлкесіндегі әдеби-драмалық редакцияның аға редакторы, 1967 - 1969 жылдары М.Горький атындығы әдебиет институты жоғары әдебиет курсында тыңдаушы, Қазақстан жазушылар одағында драматургия және кинодраматургия секциясының меңгерушісі қызметін атқарған. 1957 жылы "Жұлдыз" журналында "Дала күйлері" киносценарийі жарияланды. "Ақбөпе", "Белгілі белестер" (киносценарийі Қ.Мұхамеджановпен бірге), "Ақбала" (1959), "Ботагөз" тарихи драмасы (С.Мұқановпен бірге), "Бір шаңырақ астында" (1971), "Ажал вагонының тұтқыны", "Күй құдіреті" (Х.Ерғалиевпен бірге) пьесаларының сондай-ақ, "Сары жайлау", "Біздің Сәбит", "Сахна ақсақалы", "Достық әні" фильмдер сценарийінің авторы. Пьеса, новелла, ғылыми зерттеу мақалалары шет ел тілдеріне аударылған.