Ақтоғай-Достық темір жолы

Ақтоғай-Достық темір жолы
Жалпы мағлұмат
Орналасуы	Алматы облысы, Алакөл ауданы
Станциялар саны	Ақтоғай, Сарықұм, Сайқан, Бескөл, Көктұма, Жалаңашкөл, Достық
Қызмет көрсету
Ашылған жылы	1994
Техникалық мағлұматтар
Ұзындығы	304 км

Ақтоғай - Достық темір жолы – Қазақстанды трансазиялық темір жол магистралімен түйістіретін жүк тасымалдау торабына жататын темір жол. Құрылысы 1959 жылы басталып 1994 жылы іске қосылды.

Орналасуы

Алакөл ауданының аумағында, Қарақұмның солтүстік жағының үштен бірін, Сарықұмның солтүстік жиегін жанай өтіп, Тентек, Жаманты, Ырғайты өзенін қиып, Алакөлдің оңтүстік жиегін, Жалаңашкөл көлінің солтүстік жағалауын жағалай теңіз деңгейінен 360 м (Ақтоғай) биіктіктен басталып, 550 м биіктікте Қытай Халық Республикасының шекарасынан өтеді.

Тарихы

Ақтоғай - Достық темір жолы 1959 жылы салынып, төртінші санаттағы шекаралық түсіру қайта тиеу стансасы болды. 1956-1960 жылдары қазақстандық әрі қытайлық тараптан екі елдің темір жолын қосатын магистральдың құрылысы жүргізілді. Бұл жұмыстар 1988 жылы кеңес-қытай келісіміне қол жеткізілген соң қайта жаңғырды. 1990 жылдың қыркүйек айында болған темір жолдардың түйісуі нәтижесінде қазақстандық Достық стансасы мен қытайлық Алашанькоу стансасын қосатын шекара өткелі құрылып, 1991 жылы жүк құрамдарының қозғалысы басталғаннан кейін Трансазиялық темір жол магистралінің Солтүстік дәлізі іске қосылды. Сол кезеңде Достық стансасының қайта тиеу қуаты артты. Жолаушылар тасу 1992 жылдың маусым айынан бастап жүзеге асырылды.

Торабындағы стансалар мен бекеттер

Ақтоғайдан Достыққа дейін 304 км. Достықтан Талдықорғанға дейінгі арақашықтық 657 км. Темір жол бойында Ақтоғай, Сарықұм, Сайқан, Бескөл, Көктұма, Жалаңашкөл, Достық стансалары және бірқатар бекеттер орналасқан.