Алакөл ауданы

Қазақстан ауданы
Алакөл ауданы
Елтаңбасы
Әкімшілігі
Облысы	Алматы облысы
Аудан орталығы	Үшарал
Ауылдық округтер саны	24
Ауыл саны	56
Қала саны	1
Тарихы мен географиясы
Координаттары	44°13′48″ с. е. 76°51′00″ ш. б.44.23000° с. е. 76.85000° ш. б. / 44.23000; 76.85000
Құрылған уақыты	1928
Жер аумағы	23,7 мың км²
Уақыт белдеуі	UTC+6:00
Тұрғындары
Тұрғыны	69679 адам (2019)
Ұлттық құрамы	қазақтар (84,74%), орыстар (13,64%), украиндар (0,01%), немістер (0,13%), шешендер (0,40%), татарлар (0,74%), ұйғырлар (0,07%), басқалары (0,27%)
Сандық идентификаторлары
Пошта индексі	040200-040238
Автомобиль коды	05

Алакөл ауданы — Алматы облысының солтүстік-шығыс бөлігінде орналасқан әкімшілік бөлік. 1928 жылы құрылған. Аудан орталығы — Үшарал қаласы.

Жер бедері, су жүйесі

Алакөл ауданы Балқаш-Алакөл ойысы мен Жетісу (Жоңғар) Алатауы аралығында орналасқан. Жерінің оңтүстік-шығысын Жетісу Алатауының Шыбынды, Қайқаң, Жабық, Күнгей Тастау, т.б. жоталары алып жатыр. Ауданның қалған бөлігі салыстырмалы түрде жазық келеді. Бұл жерлерде аласа таулар (Арғанаты, Арқарлы, т.б.) мен құмды алқаптар (Қарақұс, Сарықұм, Тасқарақұм) алып жатыр. Солтүстігінде Алакөл топ көлдері (Алакөл, Ұялы, Сасықкөл, Жалаңашкөл) орналасқан. Жетісу Алатауынан бастау алатын Лепсі, Тентек, Шынжылы, Көксуат өзендері аудан аумағын кесіп өтіп, солтүстіктегі Алакөл, Сасықкөл көлдеріне құяды.

Климаты, топырағы, өсімдіктері мен жануарлар дүниесі

Алакөл ауданының климаты тым континенттік, қысы суық. Қаңтардың орташа температурасы –12 – 16°С, шілдеде 18 – 23°С. Жылдық жауын-шашын мөлшері жазық аймақтарда 150 – 260 мм, тау бөктерлері мен аңғарларында 350 – 550 мм. Жерінің басым көпшілігін шөлейт белдемнің сұр топырағы, ал тау бөктері мен аңғарларында қара қоңыр, бозғылт қоңыр топырақ құрайды. Құмды алқаптарда сор, сортаң топырақ түрлері кездеседі. Даласында жусан, ебелек, баялыш, күйреуік, изен, қияқ, т.б. шөптесін өсімдіктер өседі. Биік тау беткейлері мен аңғарларын шыршалы-қарағайлы орман қамтыған. Аңдардан қасқыр, түлкі, қоңыр аю, қабан, борсық, таутеке, арқар, марал; құстардан үйрек, қаз, аққу, реликті шағала, қырғауыл мекендейді; суларында сазан, алабұға, маринка, ақ амур, көксерке кездеседі. Алакөл ауданына аумағы 12,5 мың га жерді алып жатқан Алакөл мемлекеттік сулы-сазды қорығы, жалпы аумағы 27 мың га болатын Тоқты және алма ағаштарынан тұратын ауданы 32 мың га Лепсі қорықшалары кіреді. Кен байлықтарынан Андреев және Ілдерсай бентонитті кендері бар.

Ауыл шаруашылығы

Алакөл ауданында суғармалы және тәлімі егін шаруашылығы дамыған. Онда негізінен астық тұқымдастар, техникалық дақылдар (қызылша) және картоп өсіріледі. Алакөл ауданына пайдаланылатын жерінің аумағы 165,5 мың га, оның ішінде жыртылған жері 76,7 мың га, шабындығы 87,3 мың га, жайылымы 1,46 мың га. Аудан жерінен Ақтоғай-Достық темір жолы және Алматы – Өскемен автомобиль жолдары өтеді. Үшаралдан облыс орталығы — Алматы қаласына дейінгі қашықтық 570 км.

Халқы

Тұрғындар саны – 69679 (2019).

• ұлттық құрамы – қазақтар (84,74%), орыстар (13,64%), украиндар (0,01%), немістер (0,13%), шешендер (0,40%), татарлар (0,74%), ұйғырлар (0,07%), басқалары (0,27%).

Ауылдық округтер

Аудандағы 56 елді мекен, 24 ауылдық әкімшілік округке бөлінген:

• Ақжар ауылдық округі
• Ақтүбек ауылдық округі
• Арқарлы ауылдық округі
• Бескөл ауылдық округі
• Достық ауылдық округі
• Екпінді ауылдық округі
• Еңбекші ауылдық округі
• Жағатал ауылдық округі
• Жайпақ ауылдық округі
• Жанама ауылдық округі
• Жыланды ауылдық округі
• Көлбай ауылдық округі
• Қабанбай ауылдық округі
• Қайнар ауылдық округі
• Қамысқала ауылдық округі
• Қызылащы ауылдық округі
• Лепсі ауылдық округі
• Сапақ ауылдық округі
• Теректі ауылдық округі
• Тоқжайлау ауылдық округі
• Үшарал қалалық әкімдігі
• Үшбұлақ ауылдық округі
• Ынталы ауылдық округі
• Ырғайты ауылдық округі