Баланит

Баланит, баланопостит (грек. balanos) — күпектің және үрпі басы терісінің қабынуы. Бұл ауру күпектің тазаланбауынан, оның үстін майлап тұратын майдың (смегманың) және зәрдің ыдырауынан болады. Баланит қант диабетімен ауыратын адамдарда, егде кісілерде, сүндетке отырғызылмаған адамдарда жиі кездеседі. Баланит кезінде күпек ісініп, оның ішкі қабатында, үрпі басында іріңді жара пайда болып, кейде осының әсерінен шаптағы бездер ісініп, қабынады. Ауруда қышыну, жыныс қатынасын ауырсыну, сыздау байқалады. Баланит ауруын туғызатын себептердің бірі — бүрік (фимоз) немесе күпектің тарылуы. Ұл бала 2 — 3 жасқа келгенше жыныс мүшесінің басы ашылмай тұрады, оны “физиологиялық бүрік” деп атайды. Бүрік сүндетке отырғызылмаған ер адамдардың 2 — 3 %-нде кездеседі. Бұл ауру ұзаққа созылса, қуықтың зәрден босауы қиындап, несеп жолдарының қызметі бұзылады. Баланиттің емі: жалпы антибактериалды терапия (антибиотиктер, сульфаниламидтер) қолданып, Калий перманганаты, риванол, фурациллин ерітінділерімен жылы ванна жасап, вазелинмен майлап, 0,5 — 1% күміс нитраты ерітіндісін жағу керек.