Дмитрий Львович Иванов

Дмитрий Львович Иванов
Дмитрий Львович Иванов
Дүниеге келгені:	1846
Қайтыс болғаны:	1924
Мансабы:	географы, суретші

Дмитрий Львович Иванов (1846 – 1924) – Қазақстанды зерттеуші орыс географы, инженері, суретші.

Өмірбаяны

Мәскеу университетінде оқыған.

• 1865 жылы оған Каракозов ісі бойынша айып тағылып, Орынбор шекара батальондарының біріне қатардағы әскери қызметке жіберілді.
• 1867 – 1870 жылдары Бұхара хандығына қарсы жорыққа қатысып, прапорщик шенін алды.
• 1870 жылы Ескендіркөл экспедициясына қатысты.
• 1872 жылы Политехникалық көрменің Түркістан бөлімін дайындауға ат салысты. 1873 жылы дүниежүзілік көрменің Түркістан бөлімінің комиссары ретінде Венада іс-сапармен болды.
• 1874 – 1878 жылдары Санкт-Петербург тау-кен институтында оқыды.
• 1879 – 1882 жылдары Түркістан генерал-губернаторының кеңсесінде айрықша тапсырмалар жөніндегі шенеунік қызметінде болып, Самарқан, Сырдария, Ферғана, Жетісу облыстарында геологиялық зерттеулер жүргізді.
• 1879 жылы Талас Алатауында,
• 1883 жылы капитан Путята экспедициясымен Памирде болды. Осы экспедиция құрамында жүргізген зерттеулері үшін Орыс географиялық қоғамының алтын медалімен марапатталды.
• 1883 – 1893 жылдары Уссури геологиялық экспедициясын басқарды.
• 1895 жылы Батыс Сібір таулы округінде жұмыс істеді.
• 1899 – 1905 жылдары Иркутск таулы округінің төрағасы.
• 1905 – 1907 жылдары Кавказ минералды суларының директоры.
• 1919 – 1924 жылдары Ленинградтағы Геологиялық корпусттің ғылыми архивінің меңгерушісі болды.

Шығармашылығы

Иванов Жетісу өңіріне арналған мақалаларында Талас үстірті, ондағы көшпелі мұздардың қалыптасуын сипаттап, отырықшы тәжіктер мен көшпелі қазақтар туралы этнографиялық мәліметтер келтірген. Тау қойнауының темір рудасына, сұрғылт кварцке, аметист пен мраморға бай екенін жазған. “1879 жылы Алатауға барған сапар” аталатын еңбегінде геологиялық, ботаникалық және этнографиялық сипаттағы зерттеулері жөнінде баяндаған, Майдантал көшпелі мұзы, өсімдіктер, жануарлар дүниесі, Сайрамның жоғарғы сағасындағы жер шаруашылығы туралы мағлұматтар берген.